New Era Newspaper

New Era Epaper
Icon Collap
...
Home / Oositola itadhi taamba ookasitoma inaadhi zala uumaska

Oositola itadhi taamba ookasitoma inaadhi zala uumaska

2020-05-07  Victoria Kaapanda

Oositola itadhi taamba ookasitoma inaadhi zala uumaska

ONGWEDIVA - Oositola dhiikulya niikutu monooli odha itula mo n tadhi simaneke elombwelo lyomuPresidente Hage Geingob lyolweetho olutiyali, okukeelela omukithi gwoCovid-19. 
Omalandulathano ngoka ga li ga tulwa po molweetho olutiyali okuza momasiku gatano gaApilli sigo gaali gaMai nuumvo, kutya oshilongo sho tashi patuluka kehe gumwe na kale a  zala okamaska, uuna ta yi mokati kaantu nenge pehala hali gongala aantu oyendji,  oga landulwa nawa taga simanekwa lela moositola odhindji.

Oositola odhindji ongula yEtitatu monooli, odha li dha indike mboka inaya hala oku iyutha komalombwelo, okuya meni.  Oyendji oya li ya shunithwa ko opo ya ka tale uumaska wawo, ya vule oku ka landa shoka ya hala moositola.
Ositola yiikutu Pep ndjoka yi li mOngwediva, ongula yEtiyali oya li  ya shunitha ko aantu  ya pita po20, oshoka kaye na uumaska.
Ngoka kwa li ta longo pomweele, edhina lye ineli holola kuKundana, okwa ti kape na nando ogumwe ta ka pitikwa okuya meni lyositola ngele ina zala sha komayulu nokokana ke.

“Mpaka kape na omukweyo, ngele owu na okamaska, ee to iyogo koonyala owa manguluka okuya meni oshoka kamu na aantu oyendji. Shoka shi na oshilonga uumaska ashike, ngaashi omilandu  dha tulwa po nodha pumbwa okusimanekwa,” Omuniilonga ta ti ngaaka. Aantu oyendji ongula yEtitatu moondolopa oya li ya zala uumaska, shoka tashi ulike kutya oshigwana oshi na ewuveko lya gwana kutya omukithi gwoCovid-19 ogwa nika oshiponga notagu hulu po ashike uuna tagu kelelwa nokulandula omilandu dha tulwa po. Nuusiku Nepale okwa ti, oku uviteko esimano lyokuzala uumaska ashike, oshigwana kasha na iimaliwa yoku wu landa. “Otwa ninga ethimbo inaatu longa, iimaliwa katu na sha we. Okwa li nda uvu moradio kutya epangelo otali ka gandja uumaska kwaamboka ye li moluhepo ihe sigo onena inatu wu pewa,” Nepale ta nyenyeta ngaaka. Ta ti, oshike epangelo hali pititha omawuyelele ihe itage shi gwanithapo. Uumaika okwa li wu na okukala wa hawalekwa moshigwana nale esiku lyotango elombwelo ndyoka kwa li lya tulwa miilonga.

Ta gwedha po ta ti, mboka kaye na uumaska pethimbo ndika, itaya piti we moositola okukalanda iilulya yawo naashoka ya hala. 
Jeconia Nauta  gwomolukanda Uupindi mOshakati okwa ti epangelo nali tameke okugandja uumaska, oshoka yo kaye na we iimaliwa.
“Ano iimaliwa yetu yokulanda iikulya yetu momagumbo, natu yi lande po uumaska? Atu li shike ngele itatu landitha we? Ngame ond na ondingosho, ihe oya pata sigo onena iimaliwa yokulanda nokulandela ezimo lyandje otandi yi kutha peni?” Nauta ta pula ngaaka.


2020-05-07  Victoria Kaapanda

Tags: Khomas
Share on social media