Victoria Kaapanda 
        naLoide Jason 

ONGWEDIVA - Nonando oompango dha tulwa po okukeelela omukithi gwoCovid-19 otadhi ti engundumano nali keelelwe, po napu kale oompito pokati komuntu nomuntu, shoka inashi landulwa poositola oonene dhomaluvu esiku lyotango oondingosho dha patuluka, oshoka kehe gumwe okwa hala okukwathelwa tango.

Oositola tadhi landitha omalovu moondoolopa adhihe moshilongo, ongula yEtiyali odha piti dha ngundumanenwa kooyene yoondingosho, mboka yamwe yomuyo ya lala momikweyo nenge ya thiga ya yaleka omahala momikweyo.
Aantu yapita pomathele gatano oya li ya ngundumana positola yoMetro mOshakati, taya landa omalovu gawo ya ka tameke omangeshefelo gawo,  sho ya ningi oomwedhi konyala ndatu inaaya landitha omolwomukithi gwoCovid -19 ngoka gwa li gwa patitha oshilongo oshowo oongeshefa dhilwe. Shika oshi li onkambadhala yepangelo okukeelela etaandelo lyomukithi.

Aaniilonga yomoositola ngaashi Metro, Woerman Brock noshowo Cash n Carry moWindhoek okwa li ya ithana opolisi opo yi kwathele mokukaleka po elandulathano unene tuu ngele tashi ya piiyelo yoositola.
Omukuluntu positola yedhina Metro poNorthern Industry okwa hokolola kutya aakwashigwana oya li taya undula okuya meni opo ya ka lande omalovu.

Okwa ti kutya ooyene yoondingosho oyo ya meneka tango tango oku ka teka iipakete unene yoombiila noshowo omakende galwe giikolitha ngoka haga nuwa unene ngaashi uukende uushona nagalwe ogendji gendji.

Justy Oscar ngoka a li e ya okulanda omalovu gondingosho ye poMetro mOshakati okwa ti okwa meneka pontano, opo a kwathelwe mbala, ye a ka talaleke iikunwa ye omanga kuyele, oshoka ookasitoma dhe itadhi hala okulanda iikunwa ya pupyala.
“Otundi 11h00 paife, ihe natango inandi kwathelwa, onda hala okuya ndi ka tameke ongeshefa yandje opo ndi mone oshimaliwa. Onda ninga oomwedhi ndatu inandi landitha, ooyene yomatungo mpoka tandi hiila otaya pula iimaliwa yawo yohiila,” Oscar ta popi neyeme.
Nonande aashingithi oyendji okwa li taya ulike enyanyu kiipala yawo sho taya ka tameka oongeshefa dhawo, yamwe natango otaya nyenyeta oowili dha tulwa po dhokulanditha, okuza po 12h00 yomutenya sigo 18h00 yokomatango, kakele mOsoondaha.

 “Tse otwa pumbwa okulanditha twa itula mo opo tu mone oshimaliwa sha gwana tu wape okufuta oondjo dhantu ndhi tu na. Mepato lyoshilongo moka otwa za mo noondjo odhindji oshoka kakwa li tu na sho tatu lile mo,” omulumentu gumwe ta popi ngaaka.
Natalia Shikesho ngoka ha landitha iikunwa yokoongoma okwa ti, oku uvite ombili shili omalovu ga patululwa oshoka omo ha hupile, ashike natango aantu kaye uvite ko unene oshowo oshiponga shomukithi gwoCovid-19.
“Otandi ka tameka okulanditha shili oshoka omo handi hupile, ashike pondingosho yandje itapu kuutumbwa, na kehe ngoka a hala okulanda sha oku na okuya nokandini ke, yo taya  ka nwina komagumbo gawo,” Shikesho  ta ti ngaaka. Sho Kundana a piti positola onene ndjoka woo ondepo yiikolitha poMonte Crhisto aanangeshefa noshowo aakwashigwana oya li ya ngundumana momikweyo ya tegelela okupewa oompito dhokuya meni ya ka teke omakende gawo.

Minista gUuhaku nUundjolowele Kalumbi Shangula okwa popi woo ta ti ngashiingeyi oondingosho otadhi ka patuluka niikolitha otayi tameke oku landithwa ashike okutameka potundi 12h00 sigo 18h00 okuza Omaandaha sigo Olyomakaya, naalandi inaya pitikwa okunwina mpoka ihe otaya ka nwina komagumbo.

“Omahala gomanwino ngoka gooCasino nooshowo ookalamba inadhi pitikwa okupatuluka manga oshoka otaga vulu unene okugongalwa ndele aantu taya paathana omukithi ngoka,” osho a hokolola ngaaka.
Okwa ti iikolitha inayi pitikwa okulandithwa mOosoondaha nenge momasiku ngoka gowina aantu taya fudha po.
Oorestaurant odha tegelelwa ashike dhi patuluke e tadhi gandja iikulya kaantu mboka ya gandja oshilage opo ya telekelwe.
Ashike Shangula okwa hokolola kutya omalandithilo ngaashi goonyama unene okapana otaka patuluka naalandi otaya vulu okukuutumba po e taya li, ashike aantu naya kale y iiyutha komalombwelo ngaashi oku ikala kokule noshinano shomita yimwe.
Okwa ti woo kutya oshiluku shika oshititatu osha tegelelwa okuya sigo omasiku 29 gaJuni ihe ngele opwe ya sha shomeendelo tashi vulu okuthiminika opo shi talululwe nena epangelo otali vulu okulundulula onkalo ndjika.