Omupopiliko wopolifi moshitukulwa shaHangwena Sergeant Andreas Nghiyolwa okwa kunghilila oovene veendingosho opo va xulifei po okukala tava landele ovanafikola omalodu ngeenge ve li peendingosho davo.
Nghiyolwa okwa ti opolifi oya didilika ovanafikola ngeenge va pita mo meefikola ve hole okukalela eendingosho va teelela okulandelwa mo eshi shi li sha nyika oshiponga kokaana kofikola ngeenge taka nu omalodu.
Nghiyolwa edi okwe di popya Olomakaya komutumba wovalumenhu wa li komukunda Oilyateko moshitukulwa shaHangwena.
Omutumba owa ningwa nelalakano opo ovalumenhu ve uye va kundafane kombinga nghee ve na okuxulifa po oimbuluma ei tai lopotwa hai ningwa moshitukulwa shaHangwena.
Nghiyolwa okwa weda po ta ti unene tuu ovanafikola ve li momihandjo ovo unene hava kala tava landelwa omalodu kovakulunhu ngeenge va pita mo mofikola onghee eshi kasha li mondjila shaashi ohashi piyaaneke ouluvi mokaana opo ka kale ka kwatwa komhepo yokunwa omalodu.
Okwa kunghilila yoo vali ovalumenhu opo va xulife po okukala tava longo oilonga yoimbuluma nokukala yoo tava ningi oikonga yokulonga nokuyandja ouyelele nghene oimbuluma i na okuxulifwa po.
Moshipopiwa shaye Nestor Moses ou e li omuwiliki wongudu yokulwifa oimbuluma yoMen and Women Network okwa kunghilila ovalumenhu opo va kale tava lopotele ovafitaongalo, opolifi ile ovaxungimwenyo ngeenge ve li hanga tava hepekwa komadilaadilo okulonga oimbuluma.
Moses okwa weda po ta ti ovalumenhu nava xulife po okukala tava tanguna komhesho younona vavo momeumbo ile tava denge ovakainhu vavo shaashi eshi otashi yandje efano ii kounona va kufe ko oshihopaenenwa osho.
Mwene womukunda Oilyateko Haindongo Thomas Nghishinawa okwa lombwela Kundana ta ti okwa opandula unene opolifi eshi ya ninga omutumba ou opo i kale yapopya novalumenhu nghee ve na oku li kaleka kokule nokulonga oimbuluma.
Nghishinawa okwa ti okwa hala opolifi i kale tai twikile nokuninga omitumba edi opo ovalumenhu nounona voumati va kale va pewa ehongo kombinga yoimbuluma.