Aakalimo miitopolwa yokonooli oya taalela uupyakadhi womeya taga hepa, sho ookalyamupombo taya tsikile okuyaka oowili dhomeya.
Omukonaakoni nomukwatakanithi gwiimbuluma gopolisi moshitopolwa shaHangwena Aludilu Victor okwa ti, omumvo nguka owili dhi li 30 odha yakwa momundhingoloko gwEndola, moshitopolwa shaHangwena. “Eyako lyoowili uupyakadhi moshitopolwa shetu. Shika kashi shi oshinima oshipe, nonando kandi na omwaalu gwomimvo dha piti,” ta ti ngaaka. Ta ti, mboka taya longo iilonga mbyoka naye shi hulithe po, otaya tula oshigwana muupyakandhi oku ka landulula oowili oshowo okuhepeka omeya.
Ta ti, aantu mboka taya yaka oowili dhomeya aanyasha. Omupopliko gwopolisi moshitopolwa shaMusati Anna Kunga okwa ti, oowili dhi li 30, odha yakwa okuza pehulilo lyomumvo gwa yi sigo onuumvo.
“Nonando twa lopotelwa oowili 30 dha yakwa, aantu ashike yatatu ya ningi iipotha,” ta ti ngaaka.
Ta ti, ayehe ye li 27 oya ti, otaya ke shi lopota kelelo lyopamuthigululwakalo, netompelo kutya ngele osha yi miikaha yopolisi ohaya kana.
“Oyendji oya hala okufutwa iimaliwa yawo, oshoka ngele omufuthi okwa kwatwa po kopolisi iha vulu we okufuta,” Kunga ta fatulula ngaaka.
Kunga ta ti, oowili ndhoka ohandi yakwa unene kaanona yosikola, ihe mboka ya kwatwa po oya ti, ohaya tumwa kaantu, kOshakati.
“Oowili oompe mositola ohayi kala yi na N$1 400, Ihe anuwa ohaye ke dhi landitha ashike N$150,” ta popi ngaaka. Ta gwedha po kutya aanona mboka ohaya ka landitha anuwa ko ‘scrap yard’ kOshakati hoka haku landithwa iikwatenda, oshoka anuwa oowili odhi na oondjundo oonene. Omupopoliko gwopolisi moshitopolwa shaShana Frieda Shikole okwa ti, oshitopolwa shaShana nasho osha taalela uupyakadhi mboka.
“Aafuthi ohaya yaka oowili dhomeya, yo taya kalanditha. Eyako lyoowili ohali hepitha omeya noonkondo,” ta popi ngaaka.
Omumvo gwa yi aalumentu ye li yaali, muAguste okwa li ya mangwa noowili dhomeya 20 mOshakati, ihe kakwa li ya popi kutya oye dhi kutha peni.
Omupehakuluntu gwopolisi moshitopolwa shaShikoto Petrus Shigwedha okwa ti, omumvo gwa yi sigo oonguka inaya lopotelwa iipotha yoowili dhomeya dha yakwa. – vkaapanda@nepc.com.na