Victoria Kaapanda

OSHAKATI –Ooyene yookOongaleshe dhiihauto mboka haya rendinga omahala gokulongela koNamibia Development Corporation (NDC) ndhoka dhi li konima yoSpar mOshakati oyeli muumbanda yatila oku gwa omboloto mokana, sho ehangano ndjoka olyo mwene gwehala lya tokola okulanditha po ehala ndjoka.  

Oongalashe ndhoka dha kala tadhi pangelelwa iihauto omimvo dhi vule po27 odha tengenekwa dhi kale dha tembudhwa pehala mpoka dhi li monakuyiwa.

Taku hokololwa kutya oongalashe otadhi tembukile kehala limwe inaali tongololwa natango, ndyoka anuwa tali ka gandja ashike omahala kwaamboka ngashi ngeyi haya futu iifuta yokomwedhi. Ooyene yoongalashe mbaka yakwatela mo aapangeli naafikili oya li ya popi kutya, ayehe sho ye li koongalashe oomboloto taya kongo nongele otaya pewa omahala naga gandjwe ku kehe ngoka ta vulu okufutila ehala lye.

Oongalashe ndhoka ohadhi longelwa kantu ye vule po400, yamwe ohaya longele meni omanga yalwe omongalangala yowala. Nonando yamwe ka ye na omahala mpoka taya pangelele Iihauto yookasitoma dhawo, anuwa omahala opo ge li ga pata kage na aantu.

Gumwe gwomwaambaka yopongalashe okwa li a okwali a gandja uusama kaantu mboka ta ti oyo taya pathitha ehala oshoka paife oli na oongunga. Ta ti ope na ooyene yoongalashe mboka haya futile omahala gawo  gongalashe N$3 000 kehe komwedhi po pe na ishewe mboka ihaya futu sha ihe otaya pangelele komeho goongaleshe dhawo yo taya kutha po ookasitoma dhawo oshoka ohaya pula ombilihanoonkonkondo oshoka yo iha ya futu orentinga.

“Oomolwashike NDC ita gandja omahala kwaamboka ye li mokapale kaye na omahala yo ya kale wo taya futu komwedhi ngaashi tse? Ngashi naana ndu uvite kutya ehala ndika otali landithwapo oshoka oli na oondjo dhi li konima”. Omunangalashe gumwe ta ti ngaaka.

Ta gwedha po ta ti ngele ya pe aanilonga omahala ngoka ga pata, kwaamboka taya vulu okufutila omahala gawo, otaya gwedha ko wo kondando, opo ehala kali kale lyi na oondjo lyo lyi landithwepo ngaashi tashi popiwa.
“Shapo ongele pe na etompelo limwe kali shi ndoka ndyoka lyoondjo, ngashi nda uvu omufofoto kutya otali landithwa po oshoka oli na oondjo dhili konima nooN$9847.69, shi ikolela kombaapila ndjoka twa li twa pewa momasiku 28 February nuumvo”. Omunangalashe ta yelitha.

Omunambelewa Omukuluntu gwondoolopa yaShakati Werner Iita moonkundathana nonzonkundaneki ndjika okwa popi ta ti sho ya kala noku uva okamufototo ke li ngawo okwa li ya gongala nehangano ndyoka hali ungaunga noongalashe ndhoka tali ithanwa NDC. 

“Endiki lyoNDC olya li lya yamukula kutya, ehokololo lya tya  ngaaka opo li li kutya otaya tembudhwa, ashike itaya tembudhwa po paife, ihe shoka otashi ningwa ashike ngele ya monenwa ehala mpoka taya vulu okutembukila, nehala ndoka taya tembukile otali kongwa ko NDC yoyene”.Iita ta ti.

Omukuluntu ngoka e lile po endiki lyoNDC mOshakati Lot Helao sho a li a kundathana naKundana pangodhi okwa ti ita vulu okugandja uuyelele kombinga wehokololo ndyoka.

“aAnilonga mboka ya kala pehala ndyoka okwa li ya pewa oombapila kutya ehokololo ndyoka lyetembu otali talululwa manga, nonando okwa li ya pewa esiku lya hugunina mo31 gaMaalitsa nuumvo kutya olyo esiku kwa li ye na oku thiga po ehala ndyoka, ngashingeyi kasha po manga”. Helao ta ti ngaaka.

Omuniilonga poongalashe ndhoka Phineas Kwejo ngoka a longela pehala ndyoka omimvo dha pita po13 okwa ti okwa li a pewa ombapila nuumvo kutya komusilo gwomwedhi omutitatu naya kale ya ya thiga po ehala ndyoka lyoNDC, ashike inashi ningwa we naantu yoNDC inaye ya mona po sigo onena.

“Ngele oye li metifa lyoku shi ninga naya kale ye tu pa omahala mpoka tatu yi oshoka katu na omahala mpoka tatu vulu okuya, nookasitoma dhetu otatu dhi kanitha ngele twa halakana,”Kwejo ta ti ngaaka.
Ta gwedha ko ta ti aanilonga oyendji otaya kanitha iilonga, noyendji oya ikolelela ashike miilonga yawo yokoonyala mbyoka haya longele pehala mpoka. Ta ti ngele oye na ehala mpoka taye ya fala ayehe ota ye shi tambula ko.