Oministeli yoilonga noiyendifo oya yandja eemiliona N$35 opo di dule okulonga opate oyo ya kwatafana nopate ya dja kOutapi fiyo okOkahao ya uka kOmugulugwombashe.
Okwa tongwa kutya opate ya uka kOmugulugwombashe oya kala ii nokushinga. Ovanhu vopomikunda dopopepi ova kala nokulongifa ondjila ei oule weedula 20, novalongifi vayo ova kala hava nyenyeta shaashi otai nyonauna omatuwa avo.
Ominista yoilonga noyeendifo Jonh Mutorwa okwa popya kutya opate oi na unene oshilonga shakula, unene tuu ngeenge tashi ya poivilo ei hai kala kombinga oko. Okwa weda po yoo kutya elalakano lopoloyeka ei, okulonga opate opo i dule okulongifwa efimbo alishe kovaendanandjila aveshe ovo have i longifa.
Eepate domomikunda oda pumbwa okulongwa opo tu dule okweeta elunduluko momikunda. Eyambulepo leepate otali ningile ovanhu vomomikunda opo va dule okukala tava dulu okushakena poyoongalele nosho tuu.
Elongo leepate otali ningile ovaendanandjila vokoitukulwa i lili va kale hava fiki peenhele davo pefimbo. Okwa weda po yoo kutya opate ngee ya longwa ohai ningi oshinano shixupi, novanhu ohava fiki pefimbo.
“Opoloyeka yokutunga opate ei otai ka tameka neekilo omu-12 onga oshipala shotete shopoloyeka, nokonima otaku ka longwa oshipala shitivali shopoloyeka sheekilo omu-10,” Mutorwa ta ti.
Okwa kunghilila omahangano oo taa ka kufa ombinga mokulonga opate ei ngaashi Kambwa Construction (Pty) Ltd, Colas Namibia noLuka Roads Rail & Civils, vaha kute nande ovakwanedimo vavo pambabo pefimbo tava ka longa oilonga ei. Okwa weda po kutya nava kufe ovanhu momikunda opo va dule okuyandja eemhito doilonga kovakwashiwana. Okwa tumbula yoo kutya elongo lopate ei ola yandja oilonga kovanhu va fika po 40.
Epangelo otali twikile nokulonga eepate edi, opo eshi hatu ka fika momudo 2030, oinima ihapu oya pwa okulonga noi li lela kolutenda.
Omukulunhu wehangano loKambwa Construction (Pty) Ltd, David David, okwa tumbula kutya yee okuudite etumba lakula unene eshi ve li mongudu yaavo ve lineekelwa okulonga opate, nova hala okulonga oilonga ya ukilila lela.