New Era Newspaper

New Era Epaper
Icon Collap
...
Home / Opate ya pita pOkatana okuya kEndola nOnhuno ya pu okulongwa

Opate ya pita pOkatana okuya kEndola nOnhuno ya pu okulongwa

2020-06-26  Victoria Kaapanda

Opate ya pita pOkatana okuya kEndola nOnhuno ya pu okulongwa

Ehangano li na sha netonatelo lyoondjila lyedhina Road Authority (RA) olya patulula ondjila onene ndjoka ya za kOkatana ya pita mEndola okuya kOnhuno sho ya mana okulongwa.
Opate ndjoka ya za mepandaanda enene lyondjila yaShakati –Outapi-Ruacana oya kwatathana nondjila ndjoka ompe ya tsakanena pokangonga mOkatana DR3671 nondjila yaKatana-Ongwediva-Onamutai. Oya tamekwa okulongwa mo2017, noya li ya patululwa pambelewa komupevi Presidente Nangolo Mbumba omvula ya zi ko kOnhuno moshitopolwa shaHangwena.

Omunani gwoRA Conrad Lutombi okwa ti ota pandula epangale sho lya yambidhidha oproyeka noomiliona N$210 okutunga opate ndjoka nelalakano lyokutula oopate monkalo yili nawa opo yi lonjgithwe koshigwana.
 “Oopate oshinima sha simana oshoka odho oondjila dhi na oku endwa uuna gumwe tayi koshipangelo, kiilonga nosho tuu. Onkene odhina okusilwa oshimpwiyu noku tonatelwa ethimbo alihe,” Lutombi ta ti ngaaka.
Okwa fatulula ta ti, opate ndjoka oya yi na oondjila mbali kehe kombinga dha taalela kombinga yimwe, nodhi na oometa ntano pokati. Opate oyi na ehala lyaaendi yokolupadhi oshowo  lyoombasikila  lya gwedhwako kooha.
Lutombi ta ti, opate natango oyi na omalamba gokutema momapandaanda oshowo omadhidhiliko agehe ga pumbiwa no geli mondjila, oku yanda iiponga.

Ta gwedha po ta ti, natango omweelo ngoka gwa tungwa okuya kosikola yaKatana oshowo opate yoomita 500 ndjoka ya za kongeleka yaRoman Catholic oku pita omeya ngoka haga talama momudhingoloko ngoka, odha longwa kohi yopoleyeka ndjika.
Elalakano lyokutunga opate ndjoka, okutula aalongithi yopate megameno oshowo mboka haya ende koompadhi oku enda mehala li na uyelele oshowo oku te ta oondjila oonde dhi ninge oohupi.

Iilonga mbyoka okwali ya longwa kehangano lyoTecnonam/OTESA kohi yehangano lyetonatelo lyoondjila.  Okwali ya kutu aanilonga 95 oshowo aanangeshefa aashona yo pawumwene yeli 12 mboka nayo ya kutu aanilonga yawo. Ngoloneya gwoshitopolwa shaShana Elia Irimari okwali a pandula aanilonga ya longo opate oshowo epangelo sho lya yambidhidha oshitoplwa shaShana opo shi hume komeho.
“Opate oyo hayi tu fala mpoka twa hala opo tu mone uuhupilo, oyo oshikwatakanithisd shetu, onkene  osha simana okusila oopate oshimpwiyu,”Irimari a popi  ngaaka.


2020-06-26  Victoria Kaapanda

Tags: Khomas
Share on social media