New Era Newspaper

New Era Epaper
Icon Collap
...
Home / Opolifi oi li momhumbwe yoikwafifo yoCovid-19

Opolifi oi li momhumbwe yoikwafifo yoCovid-19

2021-07-01  Festus Hamalwa

Opolifi oi li momhumbwe yoikwafifo yoCovid-19
Top of a Page

Festus Hamalwa

Kakukutu komatanga opolifi yaNamibia Lieutenant General Sebastian Ndeitunga ota ti oshikondo shopolifi osha taalela omhumbwe yoikwafifo yoCovid-19 ngaashi omanyala, eefewa, nosho tuu.

Meenghundafana a ninga naKundana Ndeitunga okwa hokolola ta ti opolifi oi na omhumbwe yoikwafifo yokuliamena kombuto ei tai dana onghandangala moshilongo. Ndeitunga okwa ti oitaasi yopolifi yokonooli oyo ya didilikwa unene i na ovapolifi va pumbwa oikwafifo.

“Ombelewa yange oya didilika unene omhumbwe yomanyala okulongifwa kovapolifi ngeenge tava i koiponga yomeendjila ile ngeenge tava kwata omalutu ovanhu a ninga nayi ile ngeenge omunhu a fila ponhele yonhumba,” Ndeitunga ta ti.

Okwa yelifa ta ti ombelewa yaye oya ninga po eenghendabala dokulanda oikwafifo yovapolifi, ndele inai wana. Onghee ota indile kovanangeshefa, ile ovanhu koohandimwe opo va landele oshikondo shopolifi oikwafifo ngaashi omanyala, eefewa dokulikosha keenyala, noulapi vokomilungu.

Ndeitunga okwa ti ovapolifi ovanhu va fimana shaashi ohava longo oilonga ya fimana ngaashi okukala va tula po elandulafano nokukala va amena oshiwana.

“Ovapolifi ohava i koiponga ya yooloka omo hava pumbwa okukala va djala omanyala noulapi vokomilungu, onghee oshiwana natu kwafeleni ovapolifi vetu opo navo va kale ve li meameno ngaashi naanaa ovanailonga aveshe moshilongo,” Ndeitunga ta ti. Okwa denga omufindo ta ti ovanhu nava kale tava djala oulapi vokomilunga efimbo keshe ngeenge tava ka konga omayakulo koitaasi yopolifi. “Ovanambelewa vopolifi nava kale va djala oulapi vokomilungu ngeenge tava kwafele ovakwashiwana koitaasi ile ngeenge ve li moshikonga. Onghee nashi kale oshinakuwanifa shomupolifi keshe a kale a kwashipaleka kutya okwa djala okalapi komulungu,” Ndeitunga ta ti.

Ndeitunga okwa weda po ta ti ovanambelewa vopolifi nava kale tave liumbata nawa uuna ngeenge tava longo novanhu.

“Opolifi nai kale tai popi novanhu nombili, opolifi nai fimaneke ovakwashiwana. Omunhu keshe okwa pumbwa okufimanekwa ngaashi ovanhu aveshe. Onghee onda hala opolifi i kale i na elandufano notai longo pauyuuki ngeenge i li moshikonga shokutula po elandulafano. Omunhu ina pumbwa okukala ta tilwa omalodu komupolifi tuu nande, oshi li sha puka neenghono,” Ndeitunga ta ti.


2021-07-01  Festus Hamalwa

Share on social media
Bottom of a page