Opolifi moshitukulwa Erongo otai indile moshiwana kwau e na ouyelele kombinga yomukainhu ta kongwa vati eshi a kupalashi okaana kaye ka hangika kendiki lomangeshefelo loDunes Mall moWalvis Bay Etivali.

Omupopiliko wopolifi moshitukulwa Erongo Inspector Ileni Shapumba okwa hokolola ta ti okaana kokakadona oka hangika mondjato ka fya komukwashiwana kwa li ta ende ponhele opo.

Olutu lokaana ola twalwa kokila yopolifi opo li ka ningilwe omakonakono.

Opolifi otai indile moshiwana kwau eshi omukainhu kwa li e na eteelelo ndele ke li na vali opo shi kale sha lopotela opolifi opo omukainhu ou a kale a ningilwa omakonakono.

Eshi a kwatafana naKundana, omuxungimwenyo mouninsteli woukashike kookanhu nonghalo nawa yokaana Selma Shilongo okwa kunghilila ovakainhu opo va kale tava kwala ounona vavo koipangelo ngeenge tava hepekwa koupyakadi wopamadilaadilo.

Okwa ti ovakainhu nava ka konge omakwafo koipangelo ile keembelewa douministeli woukashike kookanhu shaashi oku ekelashi okaana ka kushi e kandule po lomukundu.

Shilongo okwa yelifa ta ti ovakainhu vamwe ohava kala va kwatwa koshinyenu unene tuu ngeenge tate wokaana iha ya yambidida okaana kaye. Onghee naashi ohashi eta opo ina yokaana a kale a kwatwa komhepo yokukupula shi okaana kaye shaashi oha kala a lulilwa konghalo.

fhamalwa@nepc.com.na