Omukonakoni woimbuluma wopolifi moshitukulwa Omusati, Omupedu Commissioner Moses Simaho okwa ti opolifi nghee natango tai indile moshiwana kwaau e na ouyelele kombinga yoibofa yomafyo atatu a lopotwa moshitukulwa neudo nomudo wa dja ko.
Simaho okwa ti fiyo opapa kape na omufekelwa a kwatwa po mekwatafano lomafyo oibofa itatu.
Onghee okwa ti opolifi oya kala nokuninga eenghendabala mokukonga ouyelele kombinga yovafekelwa ashike kape na ouyelele washa.
Oshibofa shotete oshomunafikola omukainhu a fya eshi olutu la hangika mokila yokutalaleka meumbo laye omudo wa dja ko muNovemba konima eshi kwa li a lopotwa a kana okudja kofikola.
Omanga oshibofa oshitivali oshomukainhu weedula 36 omukwashiwana waAngola olutu laye la hangika la ninga nai moixwa neudo momwedi Febuluali.
Omanga oshibofa shaxuuninwa oshokaana kokamati keedula omuwoyi olutu lako la hangika la fudikwa ombinga imwe mepya lambulavo koshi yomuti.
Olutu lokaana okwa li la monika kuinakulu eshi vati a hangika ta i kopendjela efimbo longula.
Simaho okwa ti oshiwana nashi kwatafane neengodi dopolifi opo shi dule okukala shi kale sha yandja ouyelele.
Okwa weda po ta ti omunhu ta ka yandja ouyelele ita ka popiwa moshiwana kutya olyelye onghee eshi otashi ka kala oshiholekwa pokati kavo nopolifi.