New Era Newspaper

New Era Epaper
Icon Collap
...
Home / Opolisi molukongo lwaanandholongo yahetatu

Opolisi molukongo lwaanandholongo yahetatu

2022-05-27  Victoria Kaapanda

Opolisi molukongo lwaanandholongo yahetatu
Top of a Page

Opolisi moshitopolwa shaShana oyi li molukongo lwaalumentu ye li yahetatu mboka taku hokololwa kutya oya nika oshiponga noonkondo.

Omugandji gwomauyelele moshitopolwa shaShana Thomas Aiyambo okwa ti, aalumentu mboka okwa li yi iyaka mondholongo hayi edhilile mboka ya pewa omageelo uusiku wOsoondaha ya zi ko.

“Aanandholongo mboka oya taalela omageelo ga yooloka, yamwe oya taalela omadhipago, omakwatonkonga, omahepeko , omateyo gomagumbo oshowo okuyuga,” ta ti ngaaka.

Aiyambo okwa ti, aantu mboka oya nika oshiponga noonkondo onkene otaya indile oshigwana shi kale sha kotoka oshowo kaashi ya hedhe popi una ye ya mono.

Ta ti yane yomuyo oya yambukile moAngola.

“Aafuthi mboka okwa li ya pitile moombuli dhondholongo, shoka ya longitha inashi shiwika natango,” ta hokolola ngaaka.

Oya tseyika nomandhina John Pedro (22), Nashilongo Gideon (27), Dinu Tjipito (20), Fernando Segunda Rosalio (21), Eliaser Michael Andreas (22), Zizee Tjipito (23), Teofelus Nauyoma (40) naShinedima Stefanus Sixa (28).

Opolisi kayi na uuyelele kutya aanandholongo mboka okwa li yu uka kombinga yini, nenge mboka taya vulu okuya.

“Opolisi natango kayi na omathano nando ogagumwe gomwaamboka yi iyaka mondholongo,” Aiyambo ta ti.

Ngoka e na uuyelele na tseyithile opolisi yi li popepi naye opo aantu mboka ya ze mo mokati koshigwana oshoka oya nika oshiponga.

Otashi kala sha opala uuna oshigwana shi kale shi na oonomola dhoongodhi dhopolisi dhi li popepi, nuuna pwa holoka sha naya lopotele opolisi meendelelo.

Opolisi oya ti otayi longo nuudhiginini okukonga aanandholongo mboka.


2022-05-27  Victoria Kaapanda

Share on social media
Bottom of a page