Loide Jason 

WINDHOEK - Opolisi moshitopolwa shaMusati oya londodha aakalimo yomoshitopolwa shoka opo ya ikaleke kokule niimbuluma pethimbo ndika lyomathimbo omanene oshoka yo oya ilongekidha okulwitha iimbuluma moshitopolwa shawo.

Shika osha li sha kwashilipalekwa komuhwahwameki nomukwatakanithi gwiimbuluma moshitopolwa shoka Deputy Commissioner Moses Simaho.

Simaho okwa ti oshitopolwa shoka unene otashi tala moondjila aahingi mboka taya hingi iihauto ye li kohi yodhungo.
Okwa ti oshitopolwa osho tuu shoka otashi ka shilipaleka kutya omuhingi kehe ota hingi e li nawa ke na nande iikolitha sho ya tula po oomboloka dhi li pomahala ga yooloka moopate moshitopolwa ashihe.

“Otu na aapolisi ye li miikonga taya  longitha omikalo dhokulwitha iimbuluma onkene nonade aapolisi hayo awike ya pumbwa okulwitha iimbuluma mbyoka nena oshigwana wo osha pumbwa okuyambidhidha opolisi opo ya adhe esindano mwaashoka yo woo oshitopolwa shi kale kasha na iimbuluma,” osho Simaho a hokolola ngaaka.

Okwa popi kutya aniwa omumvo gwa za ko aahingi ye vulithe pomilongo 27 moshitopolwa moka oya li ya yi konima yekumba pethimbo lyomathimbo omanene  sho ya hingi ye li kohi yodhungo.

Moka aahingi ye li yaheyali ya li ya pewa ya ifutilemo mompangu niimaliwa yi vulithe N$4000 sigo omayovi N$5000.
 Omanga aahingi ye li omilongo mbali mboka opo ya kwatwa tango ye li kohi yodhungo  oshikando shotango ya li ya pewa ashike ya fute ethimbo ndyoka sho ya kwashilipalekwa kutya oya li shili kohi yodhungo.

Okwa hokololwa kutya opolisi otayi longitha omukalo gwokufudhilamo ndele tashi ka kwashilipalekwa koshipangelo hoka omuntu ta ka kuthwa ombinzi ndjoka tayi konaakonwa kutya oyi na shili iikolitha nenge kayi na.

“Ngele shoka sha kwashilipalekwa nena opo nduno mbaka taya vulu okumangwa po yo ya wape okupewa eegeelo lyopokathimbo ndyoka taya ifutile mo ethimbo ndyoka nenge taya yi mokakuma,” osho omugandjimulombo gwopolisi a hokolola ngaaka.

Okwa li woo a londodha aakwashigwana kutya inaya thiga omagumbo gawo kage li metonatelo ngele otaya yi koondolopa dhilwe oshoka ookalyamupombo otaya vulu okulongitha ompito ndjoka okuteya omagumbo ngoka.
Simaho okwa gwedha ko woo kutya aniwa naamboka woo ye na iihauto inaya thiga iinima yongushu moohauto oshoka otashi nana oombudhi dhi iteyele moohauto e taya kutha mo shoka shi li mo.