Omunambelewapitithi melelo lyondoolopa yaShakati Katarina Kamari okwa kumagidha aakalimo mondoolopaopo ya longele kumwe, yo ya taambe ko aanambelewa taya ka pombela omagumbo gawo.
Kamari okwa ti nuumvo otaya ka pombela ashike omalukanda gamwepo, sha ikolelela kiipotha yoMalaria ya lopotwa momahala moka, okutameka kehulilo lyomumvo gwa yi sigo onuumvo.
Ta fatulula ta ti, oya totho mo ashike omalukanda gamwe oshoka itaya vulu okutsinina kehe olukanda, oshoka omuti gwokutsinina ogu na ondilo.
“Aanambelelwa mboka otaya ka enda egumbo negumbo, onkene naya tambulwe ko nesimaneko oshoka shoka taya longo oshi na sha nuuwanawa wetu, oshowo
kehe megumbo namu kale hamu thigwa omuntu ngoka te ya yakula,” Kamari a kumagidha.
Elelo lyondoolopa yaShakati, melongelokumwe nuuministeli wuuhaku nonkalonawa, otali ka tameka noshikonga oshinene shoku pombela omagumbo ngoka okuza momasiku 19 gaSepetamba notaku ka hula momasiku 30 Novemba nuumvo.
“Okupombela otaku katameka kEvululuko,Pohamba, Onawa, Oshoopala , Kandjengedi, Ehenye, Oneshila, Ekuku, Ompumbu, Uupindi oshowo Oontokele,” Kamari ta ti ngaaka.
Kamari okwa ti, elalakano lyokupombela omagumbo, okukeelela omukithi gwoMalaria ngoka hagu zi unene moomwe.
Nonande oomwe haadhihe tadhi kaya ngele omagumbo ga pombelwa, ohadhi shonopala, okushonopaleka wo oompito dhoku kwatwa komukithi gwaMalaria.
Ta ti, osha uka pethimbo lyehulilo lyomumvo, mpoka oomwe hadhi indjipala, omolwa omeya noomwidhi.
Ta popi ta ti, Uuministeli owa kala hawu hawaleke oonete dhoomwe pethimbo ndika lyokupombela omagumbo omvo kehe, ihe nuumvo ita dhi ka gandjwa.
“Omukithi gwoMalaria ogwanika oshiponga. Ohagu faalele oomwenyo dhaantu onkene otuna okukambadhala opo tu vule okugu keelela. Aakwashigwana nayo naya longitho wo ikeeleli yena, okukeelela omukithi ngoka,” Kamari a popi ngaaka.
Omagumbo ngoka otaga ka pombelwa omasiku ga yooloka.
Pohamba 19-21, Evululuko22-30 Sepetemba, Kandjengedi 03-14, Onawa 17-19, Ehenye20-21, Oneshila24-27 Oktomba, Oshoopala 28-02, Ekuku 03-07, Ompumbu 08-10, Uupindi south 11-15, Eentokele south 16-18, Uupindi north 21-23, oshowo Oontokele north 24-30 Novomba.
Caption: Aakalimo mOshakati ya indilwa ya longele kumwe naanambelewa taya pombele omagumbo okuza oshiwike tashi ya.
– vkaapanda@nepc.com.na