Etsokumwe ndyoka okwa li lya shaininwa koproyeka yaNakalega kUukwangula, hoka oNational Food Security oshowo Nutrition Policy kwa li ya patulilwa pambelewa omumvo gwa yi, muDesemba.
Ngoloneya gwoshitopolwa shaShana Elia Irimari okwa ti, etsokumweuvathano ndyoka ya shaina, okutula po oshinakugwanithwa kutya uupyakadhi wiikulya itau holoka moshitopolwa moka.
“Ngele tashi ya momikunda moka mu na aantu ya taalela onkalo ondhigu, otatu kala twa kwashilipaleka kutya onkalo yoku eta po iikulya oya kandulwa po,” ta fatulula ngaaka.
Etsokumwe ndyoka olyo tai ka indika onkalo yondjala yi holoke moshitopolwa shaShana omolwegano ndyoka lya tulwa po kutya, iikulya yiikwamongwa yi longwe moshitopolwa.
Ndaahama Timoteus gomomukunda Uukwangulwa okwa ti, oyu uvite ombili sho etsokumwe ndyoka lya shaininwa komeho gawo, ano momukunda gwawo.
“Shika ethano tali ulike kutya omukunda gwetu otagu ka kala melago okuyambidhidhwa opo ya longe iikulya yiikwamongwa oshowo tayi tungu omalutu,” ta popi ye ta imemeha mo.
Ta ti, ota kumagidha ashike aakalimo aakwawo ya longe omapya gawo ya itula mo okuyanda ondjala yi ponokele momukunda gwawo.
“Nonando omvula oyo ngaa hatu ikololele muyo, uuna ya loka nawa otatu tsikile oku indila Pamba e yi tu tume ya gwana nuumvo opo tu longe nawa omapya getu, go ge tu pe wo iikulya ya gwana,” ta fatulula ngaaka.
Maria Shoolongela okwa ti, oonkondo dhokulonga oye dhi na, ihe oye na ashike uupyakadhi womeya, ngeno oye na iikunino ya ziza nawa.
“Mboka ye li popepi nuunaala womeya oyo aanelago oshoka omeya otaya pombo ashike ya ukitha miikunino yawo,” ta popi ngaaka.
Shoolongela okwa indile wo epangelo lyi kale tali yambidhidha mboka taya indile omakwatho opo ya vule okuninga iikunino yawo oshowo shoka tashi ya yambidhidha okuya po niikulya.
– vkaapanda@nepc.com.na