Victoria Kaapanda 
                                                                                                                                                                               ONGWEDIVA -Ngoloneya gwoshitopolwa shaShana Elia Irimari  okwa pandula  epangelo lyaChina sho tali gwanitha po etsokumwe ndyoka ya li ya shayina omimvo dha piti.

“Tse otwa pumbwa ekwatho lyeni lela, otwa hala okuhuma komeho ngaashi oshitopolwa sheni Jiangxi. Elongelokumwe pokati ketu olya  kwathele oshitopolwa shetu miinima oyindji ngaashi elongo, omadhewulo mooporoyeka dha yooloka noku eta po iilonga yaakwashigwana  nosho tuu,” Irimari ta ti ngaaka. 
Ngoloneya dhoka okwe dhi popi  esiku osheendo shaChina sha za koshitopolwa tashi ithanwa Jiangxi sha li sha talele po oshitopolwa shaShana Etitano lya zi ko.

Osheendo osha li shi na Aachiina ye li 12, ya li ya talele po oshitopolwa shaShana okutala nkene oshitopolwa tashi humu komeho unene ethimbo ndika lyoshikukuta, nomonkalo ndjoka oshitopolwa shi li, osheendo shika osha li sha gandja N$300 000 nomagano galwe ngoka ya li ya pingathana nOshana, sho  ya li ya gandja nayo omagano getambuleko nomapandulo.

Irimari ta ti oshimaliwa shoka sha li sha gandjwa otashi ka longithwa iilonga yongushu, mbyoka tayi ka kwathela aakalimo yomoshitopllwa shaShana momikalo dha yooloka.

Ta gwedha po ta ti okwa hala wo osheendo shoka  tashi ka galuka natango shi mone kutya iimaliwa mbyoka ya li ya gandjwa esiku ndyoka oya longa shike, opo woo ya kale ye na omukumo gokutsikila okukwathela natango monakuyiwa nokumona shili kutya oya kwathela oshitopolwa shaShana. 

Amushangandjayi gwongundu yopolitika tayi ithwana Communist Party of China (CPC) Sun Xinyang, okwa li a popi esiku ndyoka ta ti oshimaliwa shoka ya li ya gandja ita ya totha mo kutya otashi longithwa shike, ashike oye shi gandja okukwathelwa oshitopolwa shaShana momukalo oshitopolwwa shaShana sha hala okuhuma komeho nokukwathela mpoka tapu vulu okukwathelwa.