New Era Newspaper

MTC Shares
Icon Collap
...
Home / Oshana shaShitutuma  sha ningi ehala lyuuhupilo woyendji

Oshana shaShitutuma  sha ningi ehala lyuuhupilo woyendji

2021-09-07  Victoria Kaapanda

Oshana shaShitutuma  sha ningi ehala lyuuhupilo woyendji
Top of a Page

Oshana shaShitutuma moshitopolwa shaMusati osha ningi ehala lyuuhupilo lyaakalimo yomomudhingoloko moka oshowo yomomikunda dho popepi.

Oshiwike sha zi ko sho oshifokundaneki shika sha talele po omukunda Oshitutuma osha li sha mono aantu ya thika po 20, taya kwata oohi moshana moka.

 Mirjiama Shanghala a yambukile momukunda Okalumbi, ngoka gu li popepi nOshitutuma okwa ti, shoka she ya eta moshana taya lala taya lika koomwe uusiku awuhe, uuhupilo ashike. 

Ta ti, oku uvite kutya oyendji ohaya thiki pOshana shaShitutuma oshoka oshi li pomatondokelo gomeya, noohi ohadhi kala mo odhindji.

Shanghala okwa ti, aantu yamwe oya za kiitopolwa ngaashi Outapi Okalongo oshowo omikunda dhopopepi , okukonga uuhupilo.

 “Oyendji tu li mpaka ihatu longo, katu na iiyemo yasha onkene otatu kondjitha okukwata oohi oshowo oontangu, tu ka landithe oshowo okufala omweelelo komagumbo,” ta ti ngaaka.

Ta popi ta ti, nonando ye li moshana yo inaya za ko magumbo gamwe ayehe, oye na elongelokumwe oshowo ombili.

“Mpaka otu li po twa dhika ootenda, moka hatu lala. Otwa dhika oonete dhetu mo meya, dhi li momikweyo epala lyondjamba opo kehe gumwe a mone ompito yoku kwata oohi dhe, kaape na ngoka e li mukwawo ko meho,” Shanghala ta ti ngaaka.

Ta gwedha po ta ti, oye na ethimbo ndyoka haya yi momeya, ya tale ngele moonete omwa ya oohi. 

Momeya ohaya yile mo oshita, yo taya zi mo oshita. Shanghala okwa ti, moshana moka oye li mo naalumentu, taya kongo uuhupilo netompelo lyokwiinyangela yo yene, oshoka inaya hala oku ka guma iinima yaantu, yi ininge oonyala oonde.

‘’Nonando shoka tatu mono ngele twa landitha kashi shi oshiyamba, otatu nyangadhala ngaa okutula omboloto po shitaafula oshowo okuyambidhidha aanona yetu ye li koosikola,”  a popi ngaaka. 

Ta ti, otaya pandula sigo onena, inaya indikwa okuhuga oohi dhawo moshana moka.


2021-09-07  Victoria Kaapanda

Share on social media
Bottom of a page