WINDHOEK- Omupresidente Hage Geingob okwa hokolola kutya omaendathano gwoontauki otaga humu komeho shoka ngashingeyi tashi etitha epangelo lyi humithe komeho omalandulathanothaneko ge na sha noontauki muAfrica.
Ndhika Geingob okwe dhi hokolola mEtitano lyoshiwike sha zi ko omanga a li ta egulula oshigongalelenkundatha shoontauki shedhina Migration Dialogue for South Africa (MIDSA) shoominista moWindhoek.
Oshigongi shika osha li sha tameke momasiku 25-27 gwomweedhi gwa zi ko nosha li sha hitwa kaanambelewa aakuluntu mboka ye li iilyo yehangano lyoSouthern African Development Community (SADC) mboka ye na oshinakugwanithwa shokuungaunga noontauki, iilonga noshowo omakwatathano gwopondje yiilongo miilongo yawo.
Mboka woo ya li moshigongi osho tuu shoka omahangano gIigwanahangana nosho wo ngoka ge lile po onkalonawa, omahangano gwopaumwene, omahangano gaaniilonga, iiputudhilo yelongo lyopombanda, noshowo yamwe mboka haya ungaunga niinima ya pamba hoka.
Pethimbo olyo tuu ndyoka, oonkundathana dhothaathaa odha li dha holola ehuku enene ndyoka tali vulu okuhumitha komeho oshitopolwa shika SADC shi ikwatelela kontengenekothano yomumvo 2030.
Oshigongalele osho tuu shoka osha li sha dhimbulula kutya omakwatathano pokati komayendathano nehumokomeho, omalunduluko okutula miilonga oshikonga shoka sha tseyika onga Global Compact for safe, Olderly no Regular Migration (GCM) moshitopolwa omo tuu moka. Oya li woo ya zimine okutsa omukumo omapangelo gwoshitopolwa sha SADC okukala ga pamena moohedhi niilongitho yoMigration Governance Indicators mbyoka yili po nale.
Momukandakundaneki ngoka gwa shangwa kaaunganeki yoshigongalele shoka omwa hokololwa kutya omutumba ogwa li gwa tala unene komashongo ngoka ga taalela oshitopolwa shika ngaashi uundjolowele mokati koontauki, okunkondopaleka omagongelo goontauki, okushomonona onkalonawa yi na sha nuuntauki noshowo okunduluka po oompango nomisindalandu, okudhu uva ko noku dhi tula miilonga.
Omukuluntukwatakanithi ngoka e na sha nomakwatathano moshitopolwa osho tuu shoka Jill Helke okwa tumbaleke oshitopolwa shika ta ti kutya okwe ya panda molwa okutsikila kwawo mokuya moonkundhathana okuhokolola kombinga yiinima ya pamba oontauki.
“Oonkundathana okupitila momitumba ngaashi ndhika odho dhe tu kwathela mokweeta po omalunduluko ga yooloka ngele tashi ya kiinima ya pamba omaendathano noontauki moshitopolwa shetu muka,” osho Helke a hokolola ngaaka.
Omupilima gwoshilongo shika omusimanekwa Saara Kuugongelwa- Amadhila okwa hokolola kutya oshigongalele shonuumvo osha dhimbulula a pen a elunduluko okuza moka aayambidhidhi yoontauki ya li taya nana nondatu omanga shu uka hoka taya longo memanguluko.