ONGWEDIVA - Omukuluntu gwoshikondo shuundjolowele shepangelo moshitopolwa shaMusati Alfons Amoomo okwa kumagidha oshigwana kaashi tongole aantu taya fekelelwa omukithi gwoCovid-19 nenge taya ulike ya fa ye na omandhindhiliko haga endele pamwe nombuto ndjoka.
Amoomo okwa ti osha puka okutongola omuntu e li monkalo yi li ngaaka. Sigo onena oshitopolwa shaMusati osha ikalekela aantu ye li 106, mboka ye li 18 yomuyo natango ye li momahala goku ikalekela aantu.

“Oshigwana nashi landule omalandulathano nomilandu dhokukeelela omukithi ngoka. Kehe gumwe na kale ta iyogo koonyala ethimbo kehe, na pu kale omahala pokati komuntu nomuntu kutya omegumbo na kehe mpoka ta yi,” Amoomo ta ti.
Ta ti ndhoka odho ashike omilandu dhi li mondjila okukeelela omukithi kaagu taandele. Ta ti uuna pe na omuntu a zi kiipotoplwa mbyoka ya patwa omolwa nenge tayi popiwa yi na aantu ya kwatwa komuthi ngoka, na tambulwe ko nombili, ihe hamasheko nenge omityo nayi.
Ndhoka okwa li e dhi popi konima omulumentu gwomimvo dhopokati a li a tulwa mehala lyoku ikaalekelwa mOkahao sho a li a zi kOmbaye nombapila yepitikilo. Omulumentu ngoka okwa tutswa ihe ina monika omukithi ngoka.

“Omulumentu ngoka okwa ikalekelwa konima a li a tseyithile aakwanezimo ye kutya okwa pitikwa a ye kegumbo, ashike okwa hala okwiikalekelwa oshoka ke shi shoka a humbata. Aakwanezimo oya li ye shi lopota koshipangelo hoka e li a ikalekelwa ngashiingeyi,”Amoomo a fatulula ngaaka.

Amoomo okwa yelitha kutya omulumentu ngoka a ikalekelwa kOkahao ke na nando omandhindhiliko g fa gocorona, ihe ota ka ethwa a shune kegumbo konima yomasiku 14, ngele ina monika omukithi ngoka, ihe ota kala ta talwa kehe esiku.
Okwa gwedha po ta ti oshigwana natango nashi hulithepo okutaandeleka omawuyelele giifundja oshoka otaga pukitha oshigwana. Ta ti naya tegelele aluhe sigo taga yelithwa e taga kolekwa opo y ega taandeleke.

Amoomo okwa ti moshitopolwa shaMusati omu na iipangelo ya ilongekidha kehe ngoka ta ka monika nenge ta ka fekelwa omukithi ngoka a pewe omayakulo ga pumbiwa. Ta ti kehe gumwe okwa manguluka okudhenga koonomola ndhoka opo aapangi ya thike pomahala mpoka ye li, yo ya mone omakwatho.
Outapi 081 238 83691, Okahao 081 254 4331, Tsandi 081 296 9448 oshowo Oshikuku 081 699 0721. Ta ti oongodhi ndhoka otadhi longo oowili adhihe 24.