Omukuluntu gwopolisi moshitopolwa shaMusati Titus Shikongo okwa ti okuha landula koompango nomalandulathano gokangendjo kuusiku oge li uupyakadhi kaakwashigwana yamwe, mboka taya tsyikile oku inyenga konima yethimbo lya tulwa po oshowo okwaagwanithapo omalandulathano galwe.
“Okuza esiku ndyoka okangendjo kuusiku ka tulwa miilonga, okwa li shi na okukala oshimpwiyu shakehe gumwe a kale a thika megumbo omanga owili ndjoka ya tulwa po inaa yi thika, ihe hakuhingwa kopolisi,” Shikongo ta ti ngaaka.
Oompango dhokangendjo otadhi ti, aantu oye na okutameka okwiinyenga powili 05h00-20h00 oshilongo ashihe, onga elandulathano lyokuhulithapo nokukeelela etandelo lyomukithi gwoCovid-19, sigo uusiku womasiku 12 gaSeptemba nuumvo.
Shikongo moonkundathana naKundana okwati, omawupyakadhi gamwe ya tsakaneke ethimbo ndika, oondingosho dhoka tadhi tsikile okulanditha omalovu konima yoowili dha tulwapo.
Ta ti, uupyakadhi natango owuli kiituthi tayi ngundumaneke aantu. Oshigwana nashi kaleke omwalu gwaantu yeli omulongo.
“Otu shiwete kutya omwaalu gwiipotha otagu ende gwa uka pombanda, noomwenyo tatu kanitha kehe esiku omolwa omukithi ngoka gwoCovid-19. Oshigwana nashi uveke uunene wokangendjo kuusiku oshowo oompango adhihe dhatulwapo,”Shikongo a popi ngaaka.
Agwedhapo ta ti, oshigwana nashi itaale mbala nokugwanithapo oompango dho kangendjo kuusiku.
Etanga lyopolisi otali tsikile okugandja omalongo nokukumagidha oshigwana opo shilandule oompango adhihe.
Omupehakuluntu gwopolisi moshitopolwa shaHangwena Zacharia Amakali, okwa ti, okuza esiku okangendjo kuusiku kali katulwa miilonga, oshitopolwa shaHangwena oshakala tashi iyutha noshalandula oompango adhihe.
“Sigo onena inatu tsakaneka natango uupyakadhi. Shoka tashi uulike kutya oshigwana shetu oshi uviteko nawa etompelo lyokangendjo kuusiku,” Amakali ta ti ngaaka.
Kundana sho ali aningi omapekapeko mondoolopa yaNdangwa, Ongwediva nOshakati, Omaandaha, oondolopa dhoka powili ndjoka ya tulwapo, ka kwali pena nando omuntu ta ende, ka kele kaapolisi mboka taya patolola.
Kehe ngoka taka taaguluka oompango dhoka otaka pewa eyifutilemo N$ 2000. Miitopolwa ayihe yokoonoli, sigo ompaka, kapena ngoka amangwa sho ataaguluka oompango dhokangendjo kuusiku