New Era Newspaper

New Era Epaper
Icon Collap
...
Home / Oshigwana sha lolokela egameno kiinamwenyo

Oshigwana sha lolokela egameno kiinamwenyo

2023-03-27  Victoria Kaapanda

Oshigwana sha lolokela egameno kiinamwenyo

Aakalimo yomomudhingoloko Omakange otaya nyenyeta kutya uuministeli womidhingoloko itawu gwanitha po iilonga yawo okukelela ekanitho lyoomwenyo dhaantu oshowo ehanugulepo lyomapya gawo.

Shoka okwa li ye shi popi sho okamati komimvo 17 ka ponokelwa kondjamba momukunda Okapundja oshiwike sha zi ko.  Okamatyona hoka paife otaka mono uuhaku moshipangelo oshinene shaShakati.

Helena Paulus okwa ti oye li momagumbo ihe inaya manguluka we oshoka kehe ethimbo otaya vulu okuponokelwa kiiyamakuti.

“Kehe omumvo momudhingoloko gwetu omu na okukanitha omuntu omwenyo a ponokelwa kiiyamakuti unene koondjamba,’’ ta popi ngaaka.

Uuministeli owa pumbwa okulonga nuudhiginini opo wu kandule po uupyakanldhi mbuka wa taalela oshigwana.

Joel Shintama okwa ti omapya gawo ohaga hanagulwa po koondjamba ihe nando ya gandje omanyenyeto gawo ihapu ningwa sha.

“Ano otse tu na okutembuka nenge iiyamakuti oyo yi na okukondololwa nokusilwa oshimpwiyu? Aanambelewa yanatiili otoya mono ashike ngele pwa monithwa omuntu oshiponga,’’ ta nyenyeta ngaaka.

Ta gwedha po kutya ohaya kala ye na uumbanda oku enda momikunda oshoka kaye shi uuna taya tsakaneke oondjamba nenge iiyamakuti iikwawo.

Ta ti epangelo nali hule ko oongaku ee tali kandula po uupyakadhi mboka.

Otaku hokololwa kutya okanona hoka kokamati okwa li ke li pamwe nayakwawo ye li yatatu mboka ya li yu uvu kutya momukunda gwawo omwa monika ondjamba nokwa li ye yi kongo oshoka oya li ya hala oku yi mona.

Aamati mboka anuwa okwa li ye yi mono nokutameka oku yi thaneka.

Ondjamba ndjoka anuwa okwa li ya ponokele okanona hoka omanga yakwawo ya li ye shi pondola okumatuka po.

Uuministeli womidhingoloko okwa li wa koleke oshiningwanima shoka.

Omunambelewakuluntu muuministeli womidhingoloko kOpuwo okwa ti oya lopota oshiningwanima shoka koombelewa onene dhuuministeli womidhingoloko noya tegelela shoka tashi tokolwapo.

“Uuministeli otau tsikile okulonga nuudhiginini okugamena oomwenyo dhaakwashigwana kiiningwanima ya tya ngaaka yi holoke,” ta ti ngaaka.

Omugandji gomauyelele Romeo Muyunda okwa ti uupyakadhi wekanitho lyoomwenyo onkene tau tsikile, unene momidhingoloko dhi li popepi nomakuti ge na iiyamakuti.

“Otatu kumagidha oshigwana shi gandje ompito kaanambelewa opo ya longe iilonga yawo, ihe hakwiikuthila ooveta momake gawo,’’ ta  kumagidha ngaaka.

Ta ti, oshigwana nashi longithe oompito adhihe okugamena omahala gawo kaaga ponokelwe koondjamba.

Muyunda ta ti, ngele aanambelewa ya mana nomakonakono, okugongela uuyelele awihe, otaku ka pitithwa omushangwa opo ku futwe shoka sha yonagulwa koondjamba ndhoka.

Uuministeli womidhingoloko owa pititha omushangwa kutya owa longitha oshimaliwa shi thike poomilliona N$24.1 okufuta ekanitho lyoomwenyo oshowo omayonagulo niiponga ya etithwa kiiyamakuti moshilongo.

Muyunda okwa popi ta ti, owa longitha oomilliona N$24.1 okuza ashike momumvo 2019 sigo onuumvo.

“Momumvo 2022 oomwenyo dhaantu dhi li 15 odha faalelwa kiiyamukuti omanga mo2023 dhi li mbali dha kana omolwiiyamukuti. Aantu ye li 55 oya ehamekwa nokumona iiponga,” ta ti ngaaka,

Ta ti, muule woomvula ndhoka uuministeli owa futu oshimaliwa shi thike N$2 963 852 shiimuna ya lika po kiiyamakuti, oshowo oshimaliwa shi thike N$2 569 200 shomapya ga yonagulwa kiiyamakuti.

Ta gwedha po ta ti, natango uuministeli owa longitha oshimaliwa shi thike N$640 000 okufuta iiponga ya ningilwa aantu oshowo oshimaliwa shi thike poomilliona N$3 shoomwenyo dhaantu ya dhipagwa kiiyamakuti.

“Natango oshimaliwa shi thike N$14 695 110,00 osha li sha futwa komahala ga gamenwa ga yooloka omolwuupyakadhi hau etwa kiiyamakuti,” Muyunda ta ti ngaaka.

Ta gwedhwa po ta ti, okuza 2019 oohekita dhi thike 2 637 dhomapya odha halakanithwa kiiyamukuti, uunene koondjamba, omanga okuza pokati komimvo 2022 no2023 oohekita 330 odha li dha hanagulwapo.

Muyunda ta ti, iimuna yi li 862 oya lika po kiiyamakuti okuza 2022 sigo 2023.

- vkaapanda@nepc.com.na


2023-03-27  Victoria Kaapanda

Share on social media