“Ndika otali kala endhindililko lyaaluhe, ndyoka tali tumbaleke nokusimaneka shoka Andimba Toivo yaToivo a longele oshilongo shika.” 

Ndhoka okwali dha popiwa kOmupevipresidente Nangolo Mbumba peegululo lyoshihongwafano shependafule YaToivo pokapale koondhila kaNdangwa, Etitano.

YaToivo okwa li a lukilwa okapale koondhila omimvo ndatu dha piti.

Minista gwomauyelele Peya Mushelenga, Minista gwiilonga noondjila John Mutorwa, Ngoloneya gwoshitopolwa Elia Irimari, Omukwaniilwa gwOndonga Fillemon Shuumbwa Nangolo oshowo aakwanezimo yaAndimba Toivo Ya Toivo okwa li ya thiki nokukwashilipaleka eegululo lyoshihongwafano sha YaToivo.

“Ondi shi shi kutya mpoka e li, ota imemeha ta ti, tamu mana po ethimbo, indeni mu ka longe mu humithe komeho oshilongo shika,” Mbumba ta ti ngaaka.
Ta ti, shoka okwa li e shi popi oshoka okwa li omulumetu ngoka a humbata oshigwana komutima, omulumentu ngoka a li a iyambele oshilongo shika.

“Itatu simaneke yaToivo mwaashoka a li e na, ihe otatu mu simaneke omolwekondjo a kondjele oshilongo shika opo shi kale ponkatu mpoka shi li nena,” ta fatulula ngaaka.

Omukulukadhi gwaYa Toivo, Vicki YaToivo okwati  shoka sha ningilwa omuholike gwe, efano ewaanawa ndyoka tali ulike nokutumbaleka omusamane gwe.

Ta ti, Ya Toivo okwa li omulumentu omunambili oshowo ependafule, ngoka a li a halela ashike oshilongo shawo shi Hume komeho.

“Otatu pandula onga aakwanezimo yaYa Toivo, sho twa tala efano ndyoka lyu udha oshindji tashi hokolola tate gwetu,” ta pandula ngaaka.

Ya Toivo okwa ti, otaya kwashilipaleke okukala ya sila oshimpwiyu ethano ndyoka oshowo oku li kaleka po.

Ngoloneya gwoshitopolwa shaShana Elia Irimari okwa popi esiku ndyoka ta ti ethano ndyoka otali ulike kutya Ya Toivo oku na ehala lya simana moomwenyo dhAanamibia ayehe.
“Otatu pandula epangelo sho lya simaneke nokutumbaleka YaToivo momukalo gu li ngaaka,” ta ti ngaaka. – vkaapanda@nepc. com.na