Aaniilonga ye vulithe po125 000, moshikondo shomalweendo nomatalelopo oya tumwa komagumbo oshoka kapu na we iilonga.
Ndhika odha popiwa kOminista yOmidhingoloko nOmatalelopo Pohamba Shifeta pethimbo ye naanawino ooyakwawo koshikondo she ya li ya holoka kendiki lyepangelo lyokugandja omauyelele koshigwana ge na sha noCovid-19.
Oshikondo shomatalelopo moshilongo shoka hashi eta aatalelipo moshilongo ye li pokati kaantu 500 000 no 600 000 komvula, osha dhengwa pomutima, oshoka aatelelipo mboka ihaye ya we moshilongo pethimbo lyetukuko lyomukithi.
Nonande oshi li shimwe shomiikondo mbyoka hayi eta mo oshimaliwa oshindji meliko lyoshilongo moNamibia, oongeshefa odhindji kadhi na we iiyemo, shoka sha etele aantu oyendji ye kanithe iilonga.
Shifeta okwa ti kutya oshikondo shoka osho ashike osha kala hashi eta mo oshimaliwa shi vulithe poobiliyona N$26 moshilongo.
Ta ti ngashiingeyi oongeshefa odhindji ndhoka hadhi dhana onkandangala moshikondo shika odha pata –oonshonashona dhowala –hadhi gandja omayakulo gokuteleka, odho tadi longo
“Aantu oyendji mboka ya tumwa komagumbo ngashiingeyi yamwe kaye na oondjambi. Onda hala okukwashilipaleka mpaka kutya oongeshefa dhi vulithe po1000 odha pata, naantu omayovi oya kanitha iilonga molwoshikonga shika shombuto yoCovid-19,” Shifeta a yeleke ngaaka nonkumwe.
Okwa tsikile ko kutya iikunino yiinamwenyo oyi li monkugo yi na onkambe oshoka nuumvo omapapa guukongo ngoka nago woo haga eta mo oshimaliwa moshikondo shoka itaga ningwa manga.
Ngoka a yambidhidha minista moshikonga shoka omukuluntupitithi mehangano lyedhina Namibia Tourism Board(NTB) Digu //Naobeb ngoka a hokolola kutya ngashiingeyi iihauto yi li 6000 mbyoka hayi hiilwa kaayendinandjila naatelelipo oya thikama, itaayi longithwa manga oshoka oshilongo oshi li mepato.
//Naobeb okwa hokolola kutya ngele epato ndika olya undulilwa komeho nena napu ningwe omalongekidho ga kola ngoka taga vulu okugandja ompito koshikondo shoka petimbo ndika edhigu.
Naobeb okwa hokolola kutya omalweendo okuza kiilongo mbyoka hayi eta aatalelipo moNamibia ngaashi Germany, Italy, UK, China noshowo United Kingdom oya kankama manga molwa omukithi nguka gwoCovid -19, shoka sha yela kutya nande Namibia okupatulule oongamba itaka mona aatalelipo yokondje mbala. Ashike //Naobeb okwa gandja omadhilaadhilo ge kutya, shimwe tashi vulu okulongwa po opo eliko lyoshilongo lyi penduke po mbala osho okushunitha pohi iifuta mbyoka hayi futwa koondhila sho tadhi nambele moshilongo pokapale, opo ku etwe aatelelipo ya gwana moshilongo.
Bernd Schneider ngoka e li oshilyo shewilikongundumutima lyoNamibia Wildlife Resorts (NWR) ngoka a li a popi pethimbo ndika lyegandjo lyuuyelele wowina, okwa ti kutya ngashiingeyi Namibia okwa pumbwa okutula po oompito oompu ndhoka tadhi vulu okugandja ompito kuupashiyoni womoshilongo.
Schneider ta ti, Namibia ke na naanaa omwaaalu omunene gwaantu ya kwatwa kombuto yocoronavirus, nomalwaashoka epangelo olya pumbwa okuyululula ko kepato, lyo lyi ethe aakwashigwana ya talele po komahala, shoka tashi yambidhidha oongeshefa dhomalweendo nuutalelipo moshilongo ngaashi oohotela nomahala gokulila nayikwao oyindji mbyoka ya pata thiluthilu.
“Shika otashi vulu okuningwa momukalo gwa talika nawa nogwa gamenwa ngaashi naanaa hashi ningwa koositola. Otwa pumbwa okukala tu shi shi kutwa otwa pumba okukaleka po oomwenyo dhaantu ngaashi naanaa sha faathana naanaa nekaleke po lyeliko,” Scheider ta ti ngaaka.