New Era Newspaper

New Era Epaper
Icon Collap
...
Home / Oshikonga sheopaleko lyomudhingoloko sha enda nawa - Shifeta

Oshikonga sheopaleko lyomudhingoloko sha enda nawa - Shifeta

2020-02-07  Loide Jason

Oshikonga sheopaleko lyomudhingoloko sha enda nawa - Shifeta

WINDHOEK-Minista yomidhingoloko nomatalelopo Pohamba Shifeta okwa hokolola kutya oshikonga sho koopaleka shedhina National Clean-up Campaign omumvo gwa zi ko osha enda nawa lela. Shika Shifeta okwe shi popi sho a li ta popitha engathithi lyaaniilonga muuministeli mboka omutenya gwEtitatu lyoshiwike shika moshilandopangelo.

Okwa hokololwa kutya oshikonga shoka oshinima shi shi okweendululwa nokutamununwa ee tashi ningwa oshinene noshihwepo. “Otwa pumbwa okunkondopaleka uukalinawa neuvoko li li nawa moshikonga shoka noshowo okulundulula oohedhi nomadhilaadhilo gaakwashigwana yetu ngele tashi ya kokugagaleka omidhingoloko dhetu,” osho Shifeta a kwandjengele ngaaka komeho gaanambelewa ye.

Okwa tsikile ko ta ti kutya otaya tsikile nokulongela kumwe nomalelo gookansela noshowo gwoondoolopa mokutsa oshimpwiyu kutya  onkalo yokweekelahi iiyagaya noyokugongela  oya hwepopalekwa oshilongo ashihe.

Shifeta okwa hokolola kutya okuhwahwameka aakwashigwana okupitila mookuumehangano yopondje osha ninga oshinima sha simana noonkondo nonande onkalo yoshimaliwa oya nayipala moshilongo. “Otashi hokitha kutya otwa longa nuudhiginini moku konga oonzo dhetu yene dhoka twa longitha opo oshikonga shoka shi kale sha enda nawa koonono moombinga adhishe dhomudhingoloko ngoka,” osho a tsikile ko nasho shoka.

Shifeta okwali woo kutya oopoloyeka mbali odhali dha langekwa nomayambidhidho gwopashimaliwa shi thike poomiliona N$300 noshowo yimwe yedhina Global Environment Facility ndjoka ya yambidhidha opoloyeka yedhina  Namibia  Integrated  Landscape  Approach foe Enhancing Livelihoods and Environmental Governance  opo yi shunithe ondjala noluhepo pevi.


2020-02-07  Loide Jason

Tags: Khomas
Share on social media