Lasarus Hakwaake
EENHANA – Ombelewa yelongo moshitukulwa Ohangwena oya tameka noshikonga shoku ongela oulikwafifo voukadona opo ku dule ku kwafwe ounona voukadona ava opo tave litumbu po. Oshikonga eshi, osha tamekwa ashike konima yefimbo linini eshi kwa li oshikonga sha faafana sha tamekwa koUministeli wElongo, Ounghulungu nEenghulunghedi moshilandopangelo.
Omunambelewa omukulunhu welongo moshitukulwa Ohangwena Isak Hamatwi okwa kufila ko Kundana oshivike eshi kutya ova tameka noshikonga eshi tashi pula ovanhu pouhandimwe opo va kale ve liyamba nokuyambidida ombelewa i dule okukala ya kwafa ounona ovo ovakulunhu vavo itava dulu okulanda oulikwafifo ovo. Okwa twikila ta ti, ombelewa yaye oya ninga efimbo tai lopotelwa kutya ope na omafaulo mahapu mokati kounona voutyapa. Mokuninga omakonakono omoule okwa didilikwa nokutya okufaula kounonona voukadona okwa etwa komhumbwe youliyakulifo ovo hava longifwa kounona pefimbo olo lelunduluko lomalutu avo. Okwa ninga eindilo olo la pendula omadiladilo avahapu ovo va dula okunyamukula noku heli kwata paku yandja oulikwafifo moipakete oyo ya tulwa peembelewa delongo nopeefikola moshitukulwa. Kepulo kutya oshikonga otashi xulu naini, okwa nyamukula nokutya oshikonga otashi twikile opo ku dule ku vatelwe ounona va twikile neetundi alushe nopehe na ohoni.
Metumwalaka laye okwa shivifila oshiwana kutya omafimbo oukadona oo oshitukulwa shopashitwe noshi li oshitopolwa shoufemba womunhu. Novanhu kave na okutala oshinima eshi melimweneneno ile ngeno kutya oshipwe, nokape na omukainhu a pumbwa okufya ohoni onghalo ei yopaushitwe.
Okwa ti, vo melongo ove na oshisho opo ounona voukadona va kale va nyekwa mo momitotolombo odo omafimbo nomafimbo da etwa keenghulunghedi nokutya ihadi dulu kulundululwa. Otaku popiwa kutya eenghulunghedi dimwe nokuli omukainhu ohe likalekelwa ngeenge e li komafimbo. Eshi oshinima shii unene ngeenge ounona voukadona va lombwelwa kutya efimbo ve li komafimbo inava pumbwa va kale mokati kovanhu, sho eshi osha ninga nee eshongo linene nokuli kounona ava ihava dulu okulanda ile okulongifa oulikwafifo woshinanena. Onga oshidjemo okaana kokakadona ngeenge oke lihange ke li komafimbo ohaka faula omafiku 4-5 kofikola osho tashi dala oidjemo yakumbala mokati kounona voukadona. Okwa ti omakwafo aeshe oulikwafifo naa tulwe peembelewa adishe delongo moshitukulwa oshoyo peefikola. Okwa weda ko yoo kutya oulikwafifo otava ka tukulwa kwa talwa keemhumbwe dovanafikola peefikola de litofelwa mo owina omolwa omhumbwe.
Isak Hamatwi okwa indila ovakufimbinga melongo lounona va twikile nokuyandja oulikwafifo opo ku dule okukalekwa po oufemba wounona nokukwashilipaleka kutya ounona voukadona ova fimanekwa.