Oshitopolwa shaShikoto oshi li metifa okulonga oopate, omolwa onkayi yoondjila yataalela oshitopolwa shoka.
Dhoka okwa li dha po piwa kuNgoloneya gwoshitopolwa shaShikoto Penda Ya Ndakolo momushangwa a li a pitiitha tagu fatulula omaupyakandhi oshowo iilonga ya taalela oshitopolwa shawo.
“Oshitopolwa shetu osha taalela uupyakandhi woopate, unene oopate dho kuushayi. Uupyakandhi wolundhi ndoka otau dhana onkandangala moshitopolwa shetu nowuna okukandulwa po omolwa esimano lyoopate,” ta fatulula ngaaka.
Ta ti, omalelo goondolopa moshitopolwa shaShikoto otaga longo nuundhiginini opo ga kandule po omaupyakandhi goondjila.
“Mongaashingeyi elelo lyondoolopa lyOmuthiya olya tameke oku tula oteya yookilometa 1.1 kokapate komamanya kamwe mondoolopa, ,” ta ti ngaaka.
Ta gwedha po kutya elelo lyondoolopa ndyoka ota li ka longitha oomilliona N$5.8 okulonga opate ndyoka. Elelo lyondoolopa lyOniipa nalyo olya longo opate yookilometa ntano koshimaliwa N$747 554.
“Elelo lyondoolopa ndyoka natango olya kala noku kondjela aakalimo yalyo oku ya ningila omauwanawa, ngaashi oku tula omalamba mondjila onene yo kuya kOnandjokwe,” ta ti ngaaka.
Ta ti, omalamba ngoka otaga longo oshilonga sha simana momundhingoloko oshoka otaga keelele aafuthi, okuyuga aantu iinima yawo ngele kwa toko.
“Iihauto nayo otayi hingi ya minikilwa nawa mondjila. Omalamba ngoka okwa li ga yambindhindhwa kehangano lyokwaandjaneka omalusheno Nored,”ta fatulula ngaaka.
Sho oshitopolwa shaShikoto tashi kondjo okukandula po omaupyakandhi goondjila, Ya Ndakolo okwa popi kutya elelo lyondoolopa lyaTsumeb olya longitha oshimaliwa oomilliona N$1.5 okuopaleka opate yo teya yokoPresident avenue.
“Ta fatulula kutya opate ndjoka oya tegelelwa okupwa okulongwa koomilliona N$1.5,” ta fatulula ngaaka.
– vkaapanda@nepc.com.na