Ondoolopa yOshikuku oyi li melongekidho lyomauliko giipindi yuunafalama oshowo iinima ayihe yOshiwambo.
Omukwatelikomeho gwomauliko giipindi Parastus Nepolo okwa ti omauliko giipindi ngoka otaga ka kala ko okuza momasiku 29 Sepetemba sigo 01 lyOkotomba nuumvo.
‘’Omauliko giipindi ngaka otaga ka kala ga yooloka komakwawo agehe oshoka ngaka otaga ka kala ge na iinyangadhalwa ya yooloka,” ta fatulula ngaaka. Nepolo ta ti, aanafaalama ayehe oya hiywa opo ya longithe ompito ndjika okuya okumona ontseyo ya gwedhwa po kombinga yuunafaalama. ‘’Otatu ka kala wo natango nomauliko giinima yOshiwambo, okuza kiikulya ayihe, iikunwa oshowo iizalomwa,’’ ta popi ngaaka. Ta gwedha po kutya shoka oye shi ningi okukaleka po nokusimaneka wo omuthigululwakalo gOshiwambo.
Omahala ngoka ohaga udha unene aanyasha, mboka ye na okutseya ashihe kombinga yOshiwambo opo wo ya vule okutaandelekitha omuthigululwakalo koshigwana shokomongula, opo omuthigulwakalo kaagu se po. Oshigwana osha pumbwa okutseya kutya oomuthigululwakalo ogo omulilo goshilongo nogwa pumbwa okusimanekwa opo gu kalekwe po.
“Aanafaalama otaya ka pewa omadheulo nkene ye na okukwatela po iikunino yawo oshowo iimuna yawo, mboka taya ka pulwa okufuta ashike N$1 500,” ta ti ngaaka.
Nepolo okwa ti, aanafaalama otaya ka longwa oshindji okupitila momadhewo moka, onkene ompito ndjika hayo yoku ethiwa,” ta kumagidha ngaaka.
Ta ti, okwa totha mo aanafaalama ye li yatano mboka taya ka mona omandheulo oshali, mboka ye shiwike nawa momudhingoloko gwOshikuku.
‘’Kehe ngoka e na ohokwe yokukutha ombinga, oku ka ulika iipindi ye, okwa manguluka. Ehala lyiikulya, iikunwa niizalomwa olyi na N$700, omanga omahala galwe gomahangano ga yooloka lyi na N$1 500 ashike, ta fatulula ngaaka.
Ta ti, otaku ka kala omapapa gomushingithi dhingi, ngoka ta ka hogololwa okupitila muuyogoki, mokuteleka dhingi niikwawo oyindji tayi ka talika.
Nepolo okwa ti, otaku kala wo natango ku na iinyangadhalwa ya yooloka, oshowo omayinyanyudho.
“Otatuka gandjwa wo oolefa okuza mondoolopa yaShikuku sigo okehala hoka taku ningilwa omauliko giipindi,” ta ti ngaaka.
Nepolo okwa ti, pomweelo otapu ka futwa N$20 kaakuluntu omanga N$10 kaanona.
Omugandji gomauyelele melelo lyondoolopa lyaShikuku John Siloiso okwa ti, oya ilongekidha, onkene otaya hiya oshigwana shi ye shi itaaleleko nkene Oshikuku tashi ka ulika iipindi yawo. Okwa ti ngaashi sha tseyika nawa kutya egwopevi lyoshimaliwa olya guma oyendji, omawuliko giipindi otaga kwathele oku eta po oshimaliwa mondoolopa nokugandja oompito dhiilonga koyendji.
“Ngele mondoolopa omu na oompito dhiilonga oyindji, nena naakwashigwana itaya zi mo mondoolopa okukonga iilonga koondoolopa dhokokule”, ta ti ngaaka.
Ta gwedha po ta ti ngele ehumokomeho tali etwa moondoolopa, nomuthigululwakalo nagu humithwe komeho nokusimanekwa opo kaagu dhimbiwe go gu kalekwe po.
-vkaapanda@nepc.com.na