New Era Newspaper

New Era Epaper
Icon Collap
...
Home / Oshikukuta: Ohamba Mwadinomho ‘naanona ye’ otaya nana nombali

Oshikukuta: Ohamba Mwadinomho ‘naanona ye’ otaya nana nombali

2024-05-29  Victoria Immanuel

Oshikukuta: Ohamba Mwadinomho ‘naanona ye’ otaya nana nombali

OMHEDI - Ohamba yaUkwanyama oya pula opo yi kwathelwe mokupalutha aanegumbo mboka ha sile oshimpwiyu,

Ombala yaUkwanyama oyi li egumbo lyaantu ye vulithe po70, mboka ya kwatwela mo aanona mboka ya ekelwahi kooyina, oothigwa naanona taya mono iihuna oshowo aantu kaaye na omalukalwa.

Ayehe mbaka oya tala koshipala shOhamba Martha Mwadinhomo yaKristian Nelumbu ngoka he ya sile ayehe oshimpwiyu okuza kiizalomwa, kosikola, koshipangelo nosho tuu.

Eigidho lyOmupresidente Nangolo Mbumba lyonkalo ya yaga kegonga molwoshikukuta, olya ningi shishake shandjila nekemo lyaNelumbu sho a lombwele Minista gwoohi Derek Klazen kutya ombala otayi nana nombali.

 Omaandaha goshiwike shika, Klazen sho a talele po elelo lyopamuthigululwakalo lyOukwanyama omupopiliko gwOhamba Paulus Haikali, okwa popi kutya okashona hono ye na itaka gwana.

“Kuku ota hupitha aanona ye li 45 mboka ya thigwa po kaavali yawo oshowo aakuluntu ye li 27 yaana omalukalwa, onkene otatu pumbwa eyambidhidho okuhupitha aantu ayehe mboka,’’ ta indile ngaaka.

Ngoloneya gwoshitopolwa shaHangwena Sabastian Ndeitunga okwa ti, okuulikile minista sho oshitopolwa sha taalela ondjala, nankene omapya ga kukuta omolwomuloka inagu gwana nuumvo.

“Shoka nde ku ulukile moshitopolwa shetu osha faathana naashoka shi li mepya lyOhamba ngoka ta tekula nokuhupitha aantu ye vule po70 megumbo lye,” ngoloneya ta popi ngaaka.

Ndeitunga okwa indile wo kutya mboka ye na iinakugwanithwa yokupitika iilya yomahangu okuya moNamibia naye shi ninge, ngaashi Omupresidente Mbumba e shi popi.

Omanga kwa li ta popi ngaaka Ohamba oye mu lombwele a thinde omuthindo kutya aantu inaya keelelwa we okuza moAngola niilya.

“Aantu inaya keelelwa we, etheni aantu ya lande iinima yawo ya ki ihupithe,’’ Ohamba ya popi ngaaka.

Klazen esiku ndyoka okwa ti oshikukuta okwe shi mona noku shi uvite, onkene otaka thikitha ayihe ya popiwa.

“Out na ehangeno lyoHompa, ndyoka hali pewa ookota dhoohi omumvo kehe, lyi lile po okuyambindhindha omalelo gopamuthigululwakalo agehe 53,” ta ti ngaaka. 

Ta ti, omasiku omashona komeho otaya ka kuutumba nehangano lyoHompa opo ya ka kundathane omaupyakadhi ga taalela omalelo gopamuthigululwakalo, moka mwa kwatelwa uupyakadhi welelo lyopamuthigululwakalo lyOukwanyama.

Ta gwedha po ta ti, oshi li oshinakugwanithwa shawo okukwashilipaleka kutya Hompa ota gwanitha po iinakugwanithwa ye.

“Onkene omwa manguluka oku ka konkola pomiyelo dhehangano Hompa opo mu yambidhidhwe naashoka unene mwa pumbwa,’’ Klazen ta kumagidha ngaaka.

-vkaapanda@nepc.com.na

 

 

    


2024-05-29  Victoria Immanuel

Share on social media