New Era Newspaper

New Era Epaper
Icon Collap
...
Home / Oshinyenu noyuuyemo ishona oshi li osheetifi kovapolifi ve likufe eemwenyo - Omupeduminista Kashikola

Oshinyenu noyuuyemo ishona oshi li osheetifi kovapolifi ve likufe eemwenyo - Omupeduminista Kashikola

2022-07-12  Festus Hamalwa

Oshinyenu noyuuyemo ishona oshi li osheetifi kovapolifi ve likufe eemwenyo - Omupeduminista Kashikola

Omupeduminista wouministeli weameno Daniel Kashikila okwa ti oshinyenu, oyuuyemo ishona noshoyo onghalo ii keenhele tadi longele ovapolifi oyo imwe tai etifa ovapolifi ve likufe eemwenyo.

Okwa ti ovapolifi vamwe ohava kala va kwatwa koshinyenu eshi hava longo oilonga inave i panda shaashi okukala omunambelewa wopolifi hasho oilonga ipu.

Okwa ti ovapolifi vamwe ihava kala ve na ombili yokomwenyo eshi hava kala tava longo oilonga idjuu ashike eendjabi davo odishona.

“Ovapolifi ohava longo oilonga idjuu eshi hava ka longela keenhele dimwe da nyika oshiponga, okukala momutenya pomainda, tava ende omaufiku keemhadi, tava ka konga ovanhu va fila momeva. Onghee ouministeli wetu owa fimaneka oilonga tai longwa kovapolifi,” Kashikola ta ti.

Edi Danaiel okwe di popya eshi a ninga eenghundafana naKundana Olomakaya kEenhana pefimbo kwa li ku na oshihongi shongudu yoSwapo.

Daniel okwa ti onghalo yokukala ovapolifi ve na omikuli da yolooka nasho ohashi dulu oku eta omhepo yokulikufa omwenyo komupolifi. 

Okwa ti itashi ulike efano liwa koshiwana ile kounona eshi ovapolifi hava kala teve likufa eemwenyo tava longifa eendjebo have li yashe vovene.

“Ouministeli wetu otau ka tula oinima ihapu moilonga nghee ovapolifi ve na okukala va kwafelwa ngeenge tava hepekwa koupyakadi wopamadilaadilo,” Kashikola ta ti. Okwa ti ouministeli meameno otau ka yandja omhito kovapolifi opo ve ke lihongele oshilonga shoufita noshoyo ouxungimwenyo.

Okwa ti elalakano opo moitukulwa aishe ku kale ku na ovafitaongalo ile ovaxungimwenyo opo va kale tava yandja omayakulo kovapolifi keenhele davo doilonga.

“Mopaife ngaha otuna ashike ovafitaongalo vovapolifi ve li koshitukulwa shaKhomas hava yandje omayakulo exungomwenyo kovapolifi. Onghee ohatu ka yandjaneka ovapolifi vovafita koitaashi ya yooloka shaashi otwa hala okunghonopeka oshikondo shexungimwenyo,” Daniel ta ti.

Okwa ti oumisteli weameno otau kendabala okukala wa xwexwepaleka onghalo ii kenhele dovapolifi eshi tava ka tungilwa omaumbo va dje mo meetenda noshoyo okukala va mona omauwa a wedwa po.

Okwa kunghilila ovapolifi opo va kale tava ka konga omakwafo kovafitaongalo keengeleka nokovangimwenyo koipangelo shaashi oku li kufa omwenyo ka kushi ekandule po lomukundu ndele eta po lomukundu. “Ovapolifi vamwe ovo hava yambidida ovakwapata vavo momikalo da yooloka. Ngeenge okwe li kufa omwenyo eshi otashi eta oluhepo kovakwapata vaye shaashi oye kwa li ongudi ya kula,” Daniel ta ti.

Okwa weda ta ti ka pena oupyakadi itau dulu okukandulwa po, yee ta ti ovapolifi nava kale a lushe va manguluka okupopya omaupayakadi avo novaxungimwenyo.

Oshivike sha djako omukunhu woshitaashi shopolifi shaTubusis moshitukulwa Erongo, Vilho Hamulwa weedula 56 okwa li kufa omwenyo eshi eli yashe nondjebo yemwene.

fhamalwa@nepc.com.na


2022-07-12  Festus Hamalwa

Share on social media