New Era Newspaper

New Era Epaper
Icon Collap
...
Home / Oshipangelo koHavana sha tegelelwa okupwa mo2027

Oshipangelo koHavana sha tegelelwa okupwa mo2027

2024-05-20  Victoria Immanuel

Oshipangelo koHavana sha tegelelwa okupwa mo2027

Uuministeli wuuhaku nonkalonawa owa ti, oshipangelo shopashikandjo koWindhoek tashi tungwa kolukanda Havana osha tengenekwa okupwa okutungwa momumvo 2027.

Minista guuhaku nonkalonawa Omundohotola Kalumbi Shangula esiku kwa patululwa pambelewa ehala mpoka oshipangelo tashi tungwa okwa ti, oshipangelo shoka otashi ka hwepopaleka onkalo yomangundumano nomikweyo omileeleka koshipangelo oshinene shaKatutura oshowo kuupangelo uushona.

“Oshipangelo shika natango otashi ka gandja ompito yiilonga moshigwana notashi ka gandja omayakulo koyendji momudhingoloko  gwaKatutura,’’ ta popi ngaaka.

Ta gwedha po ta ti, oshipangelo shoka otashi tameke noombete 500, otamu ka kala wo ehala lyaantu ye na uunkundi wopamadhiladhilo osho wo ehala lyiinyangadhalwa ya gwedhwa po, inaamu kwatelwa omahala galwe gokulongela.

Shangula okwa ti epangelo otali tsikile okulongela oshigwana sha sho uuwanawa unene okukwashilipaleka kutya otashi mono omayakulo agehe sha pumbwa.

“Epangelo olya kondjo okuyambidhidha oshigwana okwiikelela komikithi tadhi vulu okudhipaga oshigwana niikwathithi mbyoka yi li po. Oopelesenda 50 dhaantu ya hulitha inaya hulitha omolwomikithi hadhi vulu okukeelelwa, ihe omolwomikithi dhimwe ngaashi osuuka, ombinzi ya londa nosho tuu,’’ ta popi ngaaka.

Oshiwike sha zi ko omukuluntuwiliki muuministeli wuuhaku Ben Nangombe okwa talele po iipangelo iishona koKatutura ta tala onkalo ndjoka tayi themenene  aaniilonga osho wo aavu.

“Onda ndhindhilike kutya iipangelo oya pumbwa omahala gokuyakulilwa aavu ga gwana, oshoka omahala oga thinana,’’ ta ti ngaaka. Ta gwedha ko kutya oshipangelo shoka tashi tungwa koKatutura otashi ka yambidhidha oshigwana oshindji, nuupyakadhi wa taalela iipangelo koKatutura otau ka hula po.


2024-05-20  Victoria Immanuel

Share on social media