New Era Newspaper

New Era Epaper
Icon Collap
...
Home / Oshipangelo shaPuwo momhumbwe yovapangi

Oshipangelo shaPuwo momhumbwe yovapangi

2022-04-04  Festus Hamalwa

Oshipangelo shaPuwo momhumbwe yovapangi

Ovapangi hava longo koshipangelo shepangelo kOpuwo ota nyenyeta kombinga yomhumbwe yovapangi eshi paife oilonga ya ninga ihapu kuvo shaashi ohava ya kula ovanaudu vahapu mefiku limwe.

Ovapangi ova ti ova lulilwa okukala tava longo eevili dapitilila shaashi oshipangelo ohashi yakula ovanaudu vahapu unene, oku yelakanifa nomuvalu wovapangi tava longo moshipangelo.

Momukandanyenyeto womafiku 30 Marisa 2022, o ova nyolela kombelewa yamukulunhuwiliki wounimisteli wouhaku Ben Nangombe ovapangi ava otava pula opo ouministeli wavo u kute ovapangi vawana moshipangelo shaPuwo.

Momukanda omwa shangwa yoo vali enyenyeto kombinga yoshimaliwa ihashi futwa she lixwa po ngeenge ovapangi va longa eevili da pitilila.

Ova hokolola kutya oshipangelo shaPuwo oshi shimwe hashi yandje omayakulo opaunamiti kovakwashiwana vahapu vomoshitukulwa shaKunene, nomwaalu vovanhu tau ende wayuka pombada moshitukulwa.

“Ohatu pula yoo opo ombelewa yomukulunhuwiliki i kufe moilonga omunambelewa a kula koshipangelo shaPuwo shaashi okuna okatongo koukwamuhoko.  Oha ningi nai ovanailonga ovapopi vOshiwambo nonghee otwa didilika eendokola dihapu tadi ende tadi fiye po oshipangelo molwo omikalo daye,” tava hokolola momukanda wavo.

 

Ovapangi ova weda po tava ti ova hala oshipangelo shavo opo shi kale sha longolulwa shaashi ka shili monghalo iwa unene tuu koundjuwo nomeembelewa dovapangi.

Ovati ova hala okunyamukulwa moule womafiku 10 shaashi endilo lavo ola endelela unene.

Hamushanga wehangano lovapangi moshilongo loNamibia Nurses Union (NANU) Junias Shilunga okwa ti okwa didilika onghalo yovapangi tava longo noudjuu koshipangelo shaPuwo nova taalela omashongo a yooloka.

Shilunga okwa ti epangelo ola pumbwa okukala tali pwilikine komanyenyeto ovanailonga vouhaku moipangelo opo li dule okukala la kandula po omukundu ou diva.

“Ovapangi ova pumbwa okukala tava longele momidingonoko dili nawa opo va dule okuyandja omayakulo eli xwapo kovanaudu koipangelo,” Shilunga ta ti.

Omukulunhuwiliki mouministeli wouhaku Ben Nangombe okwa ti omukandanyenyeto ina wa fika ko natango kombelewa yaye onghee okwa ti ngeenge okwa mono omukanda ou ota kayandje enyamukulo diva.

- fhamalwa@nepc.com.na


2022-04-04  Festus Hamalwa

Share on social media