New Era Newspaper

New Era Epaper
Icon Collap
...
Home / Oshipotha shaAmushelelo naDimbulukeni sha undulilwa kuJuli nuumvo

Oshipotha shaAmushelelo naDimbulukeni sha undulilwa kuJuli nuumvo

2022-05-27  Victoria Kaapanda

Oshipotha shaAmushelelo naDimbulukeni sha undulilwa kuJuli nuumvo
Top of a Page

Oshilyo shongundu yoNamibia Economic Freedom Fighters (NEFF) Micheal Amushelelo oshowo omuxwaxwameki gongundu yopapolitika Affirmative Repositioning (AR) Dimbulukeni Nauyoma oya kalekwa mondjendhililo.

Aalumentu mbaka okwa li ya ningi omayindilo gokwiimboloha mo, nokwa li ya tindilwa eifutilemo momapngulilo yaKatutura mOvenduka Etiyali.

Oshipotha shawo osha undulilwa momasiku gatano gaJuli nuumvo.

Amushelelo okwa li a ningi onkambandhala yeyindilo lyeyifutilemo nomatompelo kutya, oye ha tula omboloto poshitaafula shaakwanezimo ye onkene ngele okwa kalekwa mondjendhililo ethimbo, otaya si ondjala.

“Ondi na natango omaliko gongushu yoomilliona dhontumba ndi na okukala nde ga sila oshimpwiyu,” ta popi ngaaka.

Okwa li a gandja omatompelo ngoka okunkondopaleka eyindilo lye opo a ze mo mondjeendhililo.

Amushelelo okwa kalelwa po kuhahende Nambili Mhata omanga Nauyoma a kalelwa po kuKadhila Amoomo.

Amushelelo okwa li a mangwa po tango sho kwa li  i ikuthile oveta momake ge oshiwike sha zi ko nokupopya kutya Aachiina naya pate oongeshefa dhawo  netompelo kutya iinima mbyoka yAanamibia ya fikwa po oya faathana owala naambyoka tayi landithwa moositola dhAachina, komatungo taga ithanwa China Town mOvenduka.

Esiku lyomunyanyo gwa li gwa ningwa sha landula epato lyoositola dhaAchiina, omupresidente gwehangano lyo-NEFF Epafrans Mukwiilongo oshowo omukulukadhi gwAmushelelo oyo kwa li yamwe yomwaamboka yaheyali ya mangwa nokwa li ya mangululwa esiku lya landula, sha ikwatelela komalandulathano noompango dha tulwa po.

Etokolo lya ningwa kuAmushelelo olya hwahwamekwa koshiningwanima sha ningwa kehangano Namibia Revenue Agency (Namra) ndyoka kwa li lya hanagula nokufika po iilandithomwa yAakwashigwana mbyoka ya kwatelwa koongamba dha yooloka.

“Pateni, pateni oositola adhihe nadhi pate, ngele hasho otatu dhi fike po, dhengeleni opolisi,” osho Amushelelo a li ta popi ngaaka omanga ta patitha oositola poChina Town.

Iinima mbyoka ya li ya hanagulwa po otaku hokololwa yongushu oomiliyona N$5.

Ta ti, Iilandithomwa oyindji yomuyo ya za koChina, ohayi landwa kaakwashigwana unene mboka kaaye na iilonga, taye ya okuyi landitha moshilongo, ashike Namra okwe yi kwata po netompelo ndyoka kutya oya ningwa nomadhina gomahangano gaantu, kaashi li paveta.

Komanda gwopolisi moshitopolwa shaKhomas, komufala Ismael Basson okwa li a popi kutya Amushelelo okwa patululilwa oshipotha shi na sha nokuvundakanitha aanangashefa yAchiina sho a tokola okupatitha oositila dhawo koChina Town oshowo anuwa okuhwahwameka aantu ya tameke okukutha kehe shimwe shi li moositola dhaawo kaape na oshimaliwa.

Amushelelo okwa patululilwa oshipotha shoku hwahwameka evundakano moshigwana, omatameko gane gokuya moositola dhAachina pwaana epitikilo dhooyene yoositola. – vkaapanda@nepc.com.na


2022-05-27  Victoria Kaapanda

Share on social media
Bottom of a page