Victoria Kaapanda

Ongwediva - Omulumentu ngoka ta tamanekelwa oshipotha shedhipago lyomulongwa moshiputudhilo shopombanda ShoUnivesity of Namibia mOngwediva, okwa li a holoka lwotango mompangu yaMangestrata yaShakati mEtiyali.
Paulus Nghipulenga (27), okwa li a holoka komeho gaMangestrata Toini Shilongo ta tamanekelwa edhipago osho wo ehepeko lyopaukashikekookantu na kakwa li a pulwa a tye ko sha manga. 

Okwa li a tindilwa i ifutile mo nota ka kala mondjedhililo sigo esiku lye lyompangu. Oshipotha she osha li shu undulilwa komasiku 25 Maalitsa 2019.

Nghipulenga ota tamanekelwa edhipago lyaHelao Gideon Hamuteta, omukiintu gwomimvo 23 mOngwediva, sha li sha ningwa mOsoondaha ya za ko. Hamuteta okwa zile kEefa Doukadona nokwa li e li momvula ye ontitatu moka a li omulongwalongi moHifikepunye Pohamba Campus. 

Okwa li a hulitha sho a mbondagulwa oombele iikando oyindji, nomuligu ogwa li gwa tetwa.
Otaku popiwa kutya nakudhipaga ngoka a kala anuwa e na ekwatathano lyopaihole naGideon okwa li e mu ningile omatilitho muutumwalaka uufupi mongodhi. Okwa li anuwa i idhenge olweendo okuza moWindhoek noku ya kOngwediva moka a ninga omasiku ta lala megumbo moka mwa kala Gideon.

Natango taku popiwa anuwa nakudhipaga nguka okwa li a ningi onkambadhala yoku gu ikutha sho a li a kambadhala oku imangeleka nomiya dhoongaku ashike odha tokoka. Opo ihe konima a ki igandja kopolisi.