New Era Newspaper

New Era Epaper
Icon Collap
...
Home / Oshitopolwa shaKunene sha taalela uupyakadhi wiikwathitholongo

Oshitopolwa shaKunene sha taalela uupyakadhi wiikwathitholongo

2022-07-11  Victoria Kaapanda

Oshitopolwa shaKunene sha taalela uupyakadhi wiikwathitholongo

Victoria Kaapanda

Ngoloneya gwoshitopolwa shaKunene Marius Sheya  momushangwa gwokupitha omaupyakandhi oshowo uuwanawa wa holoka moshitopolwa ashihe okwa ti, natango oya taalela uupyakandhi wiilongitho yosikola.

Opo elongo lyi hume komeho oshowo aalongwa yakale yena omukumo  noku ilonga ya manamo, oyena okukala ye li momundhingoloko gosikola tagu hokitha oshowo taya longitha iilongitho yi li monkalo ombwanawa.

“Otuna oosikola ondhindji moshitopolwa shetu kaandhina aalongwa yena iipundi, oombete momihandjo oshowo oongulu dhomihandjo,”ta tothamo ngaaka.

Ta ti, otayaka tameka noshikonga sho wina  kOutjo, hoka tayaka longa iipundi, iitafula, oombete dhoka dha teka oshowo okulanda omatalashe omape.

“Osikola yoshiputundhilo shopombanda Kunene Vocational Training Centre, ndyoka yina omahala goku longela iilonga yokoonyala geli gane oyi li po kupwa okutungwa, no tayi patululwa pambelwa methimbo efupi,” ta popi ngaaka.

Sheya natango okwa popi kutya uunafalama moshitopolwa shaKunene owo esipa lyombunda lyaakalimo yomoshitopolwa moka. “Oyendji oya ikolelela muunafalama wa yoloka, ihe omuloka gwonuumvo inagu longa nando ngaashi hagu ningi shito, shoka sha shunitha aanafalalama yamwe monima,” ta popi ngaaka.

Ta gwedhapo ta ti, nonando omvula ndyoka ya loko ka kwa li oyindji, oya nyanya ngaa mo mahala galwe, naamboka ya likola oya likola mo ngaa, no sha gwana epandulo.

Ngoloneya okwakumagidha natango aanafalama ya longithe oompito adhihe tadhi holoka okuhumitha komeho uunafalama, okukandula po oshowo okwaa ethela ondjala moshitopolwa.

“Onkalo yombepo oya ningi ondhigu okuyi tengeneka ngaashi sha kala nale, omolwa omalunduko go mbepo ga holoka,” ta popi ngaaka.

Ta ti, Natango oshitopolwa osha taalela omaupyakandhi okutothamo mboka ya taalela onkalo ondhigu oshowo mboka ye li moluhepo nenge yena omaulema gontumba, opo ya mone omayambindhindho okuza koombelewa dhawo oshowo komahangano galwe.  

– vkaapanda@nepc.com.na


2022-07-11  Victoria Kaapanda

Share on social media