Victoria Kaapanda
Aalongwa oyendji okwa li ya taalele uupyakadhi weilongo pethimbo lyoCorona, sho oosikola kwa li dha pata, omolweilongo lyopautekenika ndyoka kwa li lya kolota moyendji.
Shoka okwa li sha pendula oyendji. Unene ehangango lyoRani Group ndyoka kwali lya kutha onkatu opo lyi yambidhidhe oshitopolwa shaShana noongulu ne dhoku longelwa oshowo ongulu yimwe yokupungulila, kongushu yomilliona N$1.6.
Osikola ndyoka ya patululwa pambeelwa mehuulilo shiwike, oyili mOshakati momundhingoloko Ekuku, ndyoka oyo yotango moshitopolwa oshowo moshilongo ashihe.
Minista gwelongo Anna Nghipondoka momushangwa gwe okwa popi kutya osikola ndyoka oya tungwa melongelo kumwe nuuministeli welongo, okuhumitha aalongwa komeho pamukalo wopautekenika.
“Otuuka ponkatu yoku longitha uutekenika, ta tu thigi po okulongitha oopena noombapila, onkene ndika olyo ethimbo lyoku longekidha aalongwa, ya putuke yena ontseyo yookompiyuta oshowo yopautekenika,” ta fatulula ngaaka.
Ta ti, oshinakugwanithwa shawo, onga uuministeli welongo noku kwashilipaleka kutya aalongwa otaya endele pamwe nethimbo oshowo okulongekidhilwa onakuyiwa.
Nghipondoka okwa indile aalongwa ya longithe ompito ndyoka ya etelwa momakolo gawo, opo ya ka ninge aantu tayaka pumbiwa monakuyiwa okukandula po uupyakandhi tauka taalela oshilongo ,pautekenika.
Omupevi minista muuministeli wokuandjaneka omauyelele Emma Theofelus esiku ndyoka okwa popi ta ti, eyilongo lyopautekenika kali tegelela omuntu, onkene Namibia nali ilongo oku endela pamwe nalyo.
“Osikola ndyika otayika gandja ompito kaalongwa yena uunongo wontumba okuulika iitalenti yawo, okupitila momayilongo gopautekenika. Osikola ndyika oya simana moonkalamwenyo dhaanona ayehe,” ta fatulula ngaaka. Ta ti, okulongitha ookompiyuta okuna ompito ombwaanawa okuhumitha oshilongo shika komeho.
Ta gwedhapo kutya, monakuyiwa, monkatu ndyoka ontine ya taalelwa, kehe gumwe okwa tegelelwa okukala ena ontseyo yopaungomba, oshoka oshindji otashi ka pitila pa intanete.
Ali Dharani omukuluntu gwehangano lyoRani group okwati, elalakano lyawo okuyambndhindha oshigwana shaNamibia, shi ze po nkatu mpoka shili opo shiye ponkatu yimwe oku endela pamwe naantu ayehe. “Otwa hala aalongwa ya mone eyilongo lya pumbiwa opo yaka kale aantu ya pumbiwa monakuyiwa, opo oshilongo kaashi ka konge oonkulungu ndhimwe kondje yiilongo. Pamukalo ngoka oshimaliwa otashi kalekwa moshilongo,” ta fatulula ngaaka.
Dharani esiku ndyoka okwa ti, oye li ponkatu mpoka yeli nena omolwa eyambindhindho lyoshigwana, onkene otaya tsikile okugandja moshigwana, unene mboka yeli lela mombumbwe yoku yambindhindhwa.