Maria Shikeshi ngoka ta landitha iikulya yOshiwambo oshowo omizalo dhOshiwambo okwa fatulula esimano lyomuthigululwakalo.

“Omuthigululwakalo ogo uukwatya gomuhoko gontumba, gwi ikwatelela kelaka, eitaalo nomayihumbato gawo, iikulya, omizalo, iiyimbo, nosho tuu,” ta fatulula ngaaka.

Ta ti, aantu moshigwana oye na omithigululwakalo dha yooloka nonando yimwe yomuyo ya faathana.

Ngashiingeyi otandi popi esimano lyomuthigululwakalo gwAawambo.

“Oshitaafula shandje onde shi opaleka niinima yOshiwambo ya yooloka okuza kiikulya, iizalomwa nosho tuu, omolwesimano nohokwe ndi na lyomuthigululwakalo gwandje,” ta ti ngaaka.

Ta popi kutya omuthigululwakalo gwAawambo ogwa simana molwaashoka ohagu kwathele okuuva ko onkalamwenyo hwepo, nosho wo oku kale ka po oshigwana shili muukumwe nombili moshigwana. 

Ta ti oyendji kaye na evuko lyomuthigululwakalo, oya ndhina noya ekelahi ombepo nesimano lyomulilo goshilongo.

“Omuthigululwakalo ogwafa embo lyondjokonona, ota gutu kwatha okuuvako mpoka twaza. Nosho wo ngele owiilongo omuthigululwakalo nawa okuza petameko lela, otashi kukwatha okulandula eitaalo lyaawambo nokwiishuwa nawa ngoye mwene,” ta ti ngaaka.

Shikesho ta ti, omuthigululwakalo gwAawambo otagu ku kwatha okwiisimaneka ngoye mwene noku gu landula noku kala wa nyanyukilwa omuhoko gwAambo.

Omizalo dhaawambo, aagundjuka oyendji yongashingeyi kayeshi kutya ookuku monkulu yonale okwa li haazala shike, omolwaashoka oodhelele nenge oompuku odho dha ningwa omuzalo gwAawambo ngashingeyi, ashike monale ookuku oya li haazala uutete.

Ta fatulula kutya, utete oshipa shongombe sha hikwa nawa, shaninga oshipu nawa. 

“Aakiintu yopaife inaya isimaneka, inaya simaneka wo omalutu gawo, shika otandi shi popi nda ikolela komizalo haya zala mokati kaantu, otandhi tu sitha ohoni. Naashoka ohashi ulike eputuko lyomuntu,” ta nyenyeta ngaaka.

Ta ti, oshoka pethimbo ndiya iikutu kayali ko ngaashi paife yi li moositola, oontana dhamuthela okwa li haazala okatete komeho nokonima omanga omakanda okatete komeho owala.

Omuzalo gopamuthigululwakalo ogwa simana moohinina mboka opo ta yeya, yegu kalekepo opo wo natango gotaandele sigo omonakuyiwa, kaagu se po thiluthilu.

“Omuthigululwakalo otagu tu longo opo tukale aantu tushi iinakugwanithwa yetu na kehe mpoka tuli. Ngaashi aakadhona yakale yeshi okuteleka, okutsa nosho tuu, nosho wo aamati yakale yeshi okukanda, okukongolola nosho tuu. Omuthigululwakalo ogwa simana momuntu no mo ku kalalamwenyo komuntu,” ta fatulula ngaaka.

Ta ti, ngele kapena omuthigululwakalo oshigwana kashina mpoka shi li, oshigwana itashi kala muukumwe wumwe noku holathana. 

Ombili moshigwana otayi kanamo omolwaashoka kapena omithigululwakalo, omuthigululwakalo, omulilo goshilongo.

“Onda tala uunona wa li tau pulandje sho wa tala oonyandi, uutushi  nomahandangali kutya oshike shoka,” ta hokolola ngaaka.

“Aanona inaya falwa ashike koPizza, ihe naya talelepo wo ooyinakulu,” ta kumagdha ngaaka.

– vkaapanda@nepc.com.na