Festus Hamalwa

Omupopiliko wopolifi moshitukulwa shaHangwena Sergeant Andreas Nghiyolwa okwa kumaida oshiwana opo shi kale alushe hashi kufa ko omaukwatya eetuwa deelefa ngeenge tashi londo mo.

Okwa ti osha fimana opo omunhu a kale a kufa ko omaukwatya otuwa tete manga ina londa mo opo ngeenge a longelwa omunyonena oku shi kutya otuwa oi li ngeipi onghee eshi otashi kala shipu okulandula otuwa oyo.

Nghiyolwa okwa weda po ta ti omunhu na kale a koneke eenomola di li kotuwa noshoyo oluvala lotuwa.

Edi Nghiyololwa okwe di popya e li kwatelela kolopota yomukulupe womukainhu weedula 62 ou vati a nyekwa oshimaliwa shaye N$22150 eshi kwa li a londa molefa mu na ookalyamupombo.

Oshiningwanima eshi osha ningwa Olomakaya kOshikango moshitukulwa shaHangwena pefimbo lomoshanga shomutenya eshi kwa li omukulupe tadi kongaamba.

Vati nakuninga oshihakanwa okwa londa motuwa muna ovalumenhu vavali ndele tava shingi auka moixwa fiyo tave mu ponokele nokumunyeka oshimaliwa shaye noshoyo ongodi yopeki. Nghiyolwa okwa hokolola ta ti omukulupe okwa fiwa moixwa ndele ovafekelwa tava faduka po ashike ina monifwa oshiponga.

“Nakuninga oshihakanwa keshe kutya otuwa oi li ngei pi, yee ina kufa ko eenomola dotuwa onghee ka pena ouyelele kombinga yovafekelwa ava opo va dule okukwatwa po,” Nghiyolwa ta ti.

Okwa yelifa ta ti oha shi kala shidjuu kopolifi opo i kale tai konakonakona oshimbuluma peha na ouyelele. Nghiyolwa okwa ti opolifi oya didilika eelefa doipupulu da ninga dihapu paife eshi ookalyamupombo hava kala tava kengelele oshiwana unene tuu ovakainhu novakulupe.

“Unene eshi twa uka pefimbo lomatango manene opo naana ookalyamupombo ha va ningi vahapu onghee oshiwana nashi kale sha kotoka,” ta ti.

Oshivike sha djako omukainhu weedula 34 naye okwa kengelelwa eshi a nyekwa omaliko aye motuwa omo kwa li a londa a ufanwa mo komukainhu mukwao eshi vati e mu heke kutya na londe.

Nakuninga oshihakanwa okwa kufwa ongodi yaye yopeke, noshimaliwa osho kwa li shi li modjato yaye. Oshiningwanima eshi osha ningwa mOshakati konima yokamba yovakwaita mexuliloshivike efimbo lokonguloshi.

Vati omukainhu okwa lefa otuwa ashike okwa hanga mo omukainhu umwe novalumenhu vavali. Vati nakuninga oshihakanwa okwa li a tila mo motuwa omo ashike omukainhu oo kwa li naye e li motuwa okwe mu lombwela a londe ta ti kutya ke na eshi taningwa.

fhamalwa@nepc.com.na