Ongeleka yoUnity Grace Ministry oya yandja omakwafo kehangano ledina Kwafela Oshiwana Foundation Omaandaxa opo li dule okupewa eenhauki di li kEtunda.
Omakwafo a yandjwa kongeleka yoUnity Grace Ministry ongaashi oukutu voufila ve li 60, oidjalomwa, eeshako doilya, eefewa nomaadi okulya nokuvava nosho tuu oikwafifo ya yooloka.
Moshipopiwa shaye pefimbo ta tambula ko oikulya omukulunhu wehangano Kwafela Oshiwana Foundation Paulus Kornelius okwa pandula ongeleka yoUnity Grace Ministry eshi ya yambidida eenhauki dOvaangola.
Kornelius okwa popya ta ti ehangano lavo otali twala oikulya keenhauki di li kEtunda ei va pewa kongeleka opo oikulya i kale ya topolelwa eenhauki.
“Ehangano Kwafela Oshiwana Foundation ola totwa nelalakano opo li kale tali yandje omakwafo kovanhu aveshe ve li momhumbwe moshilongo. Onghee ohandi kunghulile oshiwana opo shi kale tashi kwatafana nombelewa yetu i li mOndangwa ngeenge sha pumbwa okuyambididwa,” Kornelius ta ti.
Okwa ti ehangano lavo ola kwafela ovanhu vahapu ngaashi ovanhu ve na oulema, ovanafikola, ovakulupe va pewa omauwa okupitila mehangano Kwafela Oshiwana Foundation.
Moshipopiwa shaye omufitaongalo wongeleka yoUnity Grace Ministry Lisias Mulike okwa popya ta ti ongeleka yavo otai twikile nokukala tai yambidida ovanhu ve li momhumbwe yoikulya noidjalomwa.
Mulike okwa ti ongeleka yavo nayo oya didilika eenhauki dili kEtunda eshi da kala tadi mono oixuna kodjala, naashi osha eta opo ongeleka yavo i kale ya ninga onghendambala yokuyambidida Ovaangola.
Okwa popya ta ti omakwafo va yandja kehangano Kwafela oshiwana okwa dja movakwaneongalo vongeleka yoUnity Grace Ministry.
Mulike okwa denga omufindo ta ti ouministeli wouhaku nonghalonawa nau kale tau longele kumwe neengeleka dopamhepo opo eengeleka di kale tadi ningile ovanaudu omaalikano moipangelo.
Okwa ti eengeleka nado odi li hadi velula ovanaudu tashi pitile mokualikanena ovanaudu, onghee osha fimana ngeenge eengeleka tadi pewa omhito opo di kale tadi ningi omailikano koipangelo.
Okwa yelifa ta ti ongeleka yavo oya kwafela ovanaudu vahapu kwa li tava vele omikifi da yooloka, omo ovanhu va ningilwa omailikano kongeleka yavo.
“Ngaashi naana kwa didilikwa kutya eenhauki dimwe oda kwatwa komukifi wonghana, ongeleka yetu otai ka ningila eenhauki omailikano opo di kale da veluka oshidu shonghana,” Mulike ta ti.
Okwa weda po ta ti eengeleka da yooloka oda manguluka opo di kale da waimina ongeleka yavo mokuyambidida eenhauki.