New Era Newspaper

New Era Epaper
Icon Collap
...
Home / Oshiwike shomuthigululwakalo sha tyapulwa koosikola monooli

Oshiwike shomuthigululwakalo sha tyapulwa koosikola monooli

2021-09-24  Victoria Kaapanda

Oshiwike shomuthigululwakalo sha tyapulwa koosikola monooli
Top of a Page

Oshiwike shomuthigululwakalo osha dhimbulukwa nosha simanekwa koosikola ondhindji monooli.

Aanasikola yokoosikola dha yooloka oya li ya zala ya opala, ya zala omizalo dhopamuthigululwakalo.

Kehe gumwe okwa li a zala omizalo dhomihoko dhelaka lyawo. Aalongwa okwa li ya zala ya opala, omanga aalongi okwa li ya kutha esiku moshiwike moka, nayo ya zala omizalo dhopamuthigululwakalo okusimaneka oshiwike shika. Evi-Lydia Ningeni omunasikola posikola pEhenye okwa ti, oya li ya simaneke oshiwike shomuthigululwakalo momikalo dha yooloka.

“Okuza mOmandaaha sigo Etiyali otwa li twa zala omizalo pamwe naalongi yetu. Etitatu nEtine otwa li twa tyapula iikulya yopamuthigululwakalo, omanga nena twa dhana iidhano yopamuthigululwakalo,” ta ti ngaaka.

Ta ti, aalongi yawo oye ya longo esimano lyomuthigululwakalo. “Onda ilonga oshindji moshiwike muka. Atushe Aanamibia, tu na omihoko dhi na  omithigululwakalo dha yooloka,” ta hokolola.

Ta popi ta ti, okwa tseya iikulya yopamuthigululwakalo yomihoko ngaashi Aakaprivi ya simaneka ohi yoZambezi Bream, Aakavango mboka ya simaneka omutete oshowo Aaherero mboka ya simaneka Omaere oshowo onyama. “Ta ti, onda tseya wo natango shoka sha pitikwa nenge sha indikwa momihoko dha yooloka, ano mbyoka ya talika ko onga iipwe nenge iidhila,” ta popi ngaaka. Ningeni okwa lombwele Kundana ta ti, oshiwike shoka oye shi tyapula nawa lela, nokwa ilonga mo  oshindji. Victor Mutota ngoka ha hiti osikola kOshakati Primary okwa ti, oya li ya fatululilwa kutya omuthigululwakalo ogwa simana nogu na okusimanekwa sigo aluhe.

“Otwa longwa kutya omuthigululwakalo ogwa zi nale nogu na okusimanekwa sigo aluhe oshoka anuwa oshinima sha adhika ko nale, go kagu na okudhinwa,” ta hokolola. Ta ti, oya li ya fatululilwa kutya omuthigululwakalo ogo omaukwatya  gomihoko dhontumba, gwi ikwatelela kelaka, eitaalo, omaihumbato, iikulya , omizalo , iiyimbo nosho tuu.

Mutota ta ti, okwa ilongo mo wo kutya aantu oye na okusimanekathana oshowo okutaamba uukwatya wooyakwawo. “Oyendji oya kanitha eitaalo lyomuthigululwaka omolwa ya lamba shoka taya longwa kaakwiilongo nenge taya landula omikalo dhawo,” ta popi ngaaka. Namibia omuyamba pamuthigululwakalo, ngoka gu na okusimanekwa nokulandulwa komihoko adhiye.


2021-09-24  Victoria Kaapanda

Share on social media
Bottom of a page