Loide Jason 

Uuministeli wElongo, Uunkulungu nOmuthigululwakalo owa hokolola kutya osikola yaanona otayi tameke momasiku 20 gaApilili nuumvo ashike aanona yosikola itaya ka ya kosikola otaya ka longelwa komalungula okupitila mointernet.
Shika osha li sha popiwa komunambelewa omukuluntu gwomuuministeli mboka Sanet Steenkamp moonkundathana dhowina kombinga yomukithi gwoCovid-19 ndhoka dha li koradio yomuzizimbe yedhina Namibian Broadcasting Cooperation (NBC) ongula yohela.
Steenkamp okwa hokolola kutya ngashiingeyi uuministeli mboka owa hogolola kutya nonande oosikola otadhi tameke aanona itaya falwa kaakuluntu kosikola oshoka onkalo yomukithi nguka inayi hwepopala.
“Monkalo yoCovid-19 muka iinima kayi li we ngaashi nale, onkene naavali noshowo aagundjuka oye na okukutha ombinga melongo lyaanona yawo lyopetameko,” osho a hokolola ngaaka.
Okwa hokolola kutya aalongi woo nayo otaya ka longela komagumbo e taya gandja ootundi ndhoka kaalongwa okupitila komalungula hoka.
Nonando ope na aanona yamwe ya za momihoko ndhoka dha thigala po kehumo komeho onkene ngaa uuministeli wa kondjitha kutya owa ninga omapekaapeko mokutala kutya oompito dhini tadhi longithwa opo aanona ya kale ya longelwa komagumbo.
Okwa ti ngashiingeyi uuministeli otawu ka pititha omukanda gwoopalela muule woshiwike shika, mokuholola kutya oshike tashi ka ningwa po ngele tashi ya kelongo lyuunona.
 Okwa li woo a tsikile ko kutya epangelo itali ka ekelahi oolopota niizemo yaalongwa mbyoka ya longwa nale ashike okwa itayela kutya ngashiingeyi omasiku ngoka ga li ge na okulongithwa ge li 197 komumvo mokugandja ootundi noshowo iinyangadhalwa mbyoka ya li ya pumbwa okupewa uunona opo wu vule okumona iitsa mbyoka tayi ka longithwa pethimbo lyekonaakono.
“Omasiku ngoka oga yi wa nale moshipala oshoka nuumvo oku na omashongo ogendji, okutameka omashongo ngoka ga etwa kefundja nangashiingeyi ope na ngoka ga etwa komukithi nguka goCovid-19,” osho a hokolola ngaaka.
Ota ti kutya aantu ayehe mboka taya yi kosikola oya pumbwa okukala ya tameka okwiilonga momagumbo nokukwathelwa kaavali mpoka tashi vulika opo aanasikola mbaka ya kale ya sindana momalongo gawo.
Oosikola ndhoka odha li dha patwa osheendelela muMaalitsa  sho moNamibia mwa lopotwa omukithi ngoka nodha li dhi na okutameka momasiku 17 gaApiilili moka ngashingeyi ya lundululilwa mumasiku 20 gwomweedhi tuu nguka.
MoNamibia ngashingeyi omu na aantu 16 mboka ya monika omukithi ngoka, ihe natango aakwashigwana onkene ngaa inaya hala okwiiyutha komalombwelo ga tulwa po.

CAPTION: