New Era Newspaper

New Era Epaper
Icon Collap
...
Home / Osunday Session oi shivike nawa molwange - Webster

Osunday Session oi shivike nawa molwange - Webster

2019-06-21  Strauss Lunyangwe

Osunday Session oi shivike nawa molwange - Webster

Strauss Lunyangwe

WINDHOEK – Nge taku popiwa efimbo lOsoondaxa, hano oSunday Session, eshi hashi uya momadilaadilo okuuya pamwe nookaume noku li denga mokatutu ka talala nawa. 

Eshi shi shivike shito oshe shi Eesoondaxa hadi tameke nomakende taa kondo kanini nakanini, oo taa hapupala fiyo okeengulasha osho hashi eta opo ovanhu va kale ve udite osho sha lukwa vati Omaandaxa matwima hano ‘oBlue Monday’ molwa opapalase.

Ashike omido dinini da pita po, omutuli kepaya weengalo mukulu Webster Snewe, okwa li a tameka ta shiki oungalo va shambulifa omwenyo konhele yomanwino yedina Fountain. Kwinya oko ovanhu kwa li hava kala ve na omhito yokupwiikina koungalo venya have linyengifa omutima tava ende kashona ye te livangeke eengalo domabulukuto ngaashi ohouse noKwaito. 

Webzido, ngaashi naanaa a shiivika nokaholike-dina kaye ota ti oha hafe nomoshipala mokutala ovanhu ve li momhepo iwa tave liudifa nawa nookaume kavo voo tava popi oundaka vopokutwi. 

“Onda tamekela koFountain konima eshi mwene wayo a li a tokola okuninga exwaxwameko ponhele yaye momaxuliloshivike, ashike ame onda li nda hoolola Osoondaxa shaashi oyo hai kala ya mwena nawa yo vali ohai kala i na eekastoma da kasha, da nyika onghulunhu nawa. Onda kala handi ningi oSunday Session okudja mo2004, nonda kala handi i keenhele da yooka,” ta fatulula.  

Snewe okwe li ongelela ongudu yovalanduli nomoule weedula odo ova kala noku mu landula keenhele akushe oko ta tembukile. 

Vamwe otava ti ovo ve lininga ovalanduli vaWebster ohava i ashike va ka nwe omalodu. Ashike ye okwa ti ye elalakano laye lovili yOsoondaxa opo ovanhu va fuwe, vaha longife nai omalodu vo vaye koilonga mOmaandaxa vehe na opapalase. 

Vamwe vomoohashikeshalye ovo va li va ya kefimbo laye lOsoondaxa ongaashi Doctor Khumalo, DJ Styles, Bibloz ovaSouth Africa novanamadina ovaNamibia. 

Edilaadilo eli, ombuto ya kunwa kunakufya Eddie Zondie, oo kwa li ha wilike eepolograma koMetro FM moSouth Africa, oko Webster a li ha pwiikine eepologalama odo.

“Eddie Zondie okwa li umwe womovanhu ovo nda li handi pwilikine shaashi okwa li ha shiki eengalo domalundi ngaashi Soul Sessions, Sunday Grooves naado daEddie Compilations. Naapa opo nee nda mona edilaadilo ledina eli loSunday Session,” Snewe ta weda po.

Snewe ta ti ota ka twikila nokulonga osho e hole fiyo efimbo olo ewi laye itali dulu vali.  
 “Ngee ondaka yange oya mwena, ohandi ka longifa ominwe dange oku finda eembade opo ndi dane eengalo, nande nee ondi kale itandi dulu vali embako. Itandi tokola kwaamwe mwene kutya ohai fudike ongolo naini, Kalunga oye ta tokolele nge,” ta mane ngaho.  

Omulumenhu ou womukulunhu e litonya oha hoolola eenhele odo tadi wapalele ongudu yovanhu ovo a hala okudanena eenghalo ngaashi doRnB nadikwao odo hadi ende kanini. Oku udite kutya ovo have ya koshiindingili alushe ohava shuna va shambukwa, ta ti kounyuni oku na ashike elaka limwe hali popiwa kovanhu aveshe –lo olo omusika. 


2019-06-21  Strauss Lunyangwe

Tags: Khomas
Share on social media