Gabriel Nghiimbwasha omulumenhu weedula 40, ou e na oulema wokomaulu oku na ongalashe yaye yokupangela oituwa, nokuxwikila oitenda modoolopa Oniipa, moshitukulwa shaShikoto.

Meenghundafana a ninga naKundana Nghiimbwasha okwa hokolola ta ti okwa monene oshiponga shotuwa eedula da dja ko, naashi osha eta nee opo omaulu aye a lemane. Mopaife ngaha Nghiimbwasha okwa ti oha longifa ashike omamhango ngeenge ta ende ile ta fikama.

“Okukala ndi na oulema komaulu eshi itashi ti kutya itandi dulu vali oku eta po sha. Ame ohandi longo oilonga ngaashi okuxwikila opo ndi shiive ndi mone oshimaliwa shokulikwafela, onghee ondi na omukumo shaashi ohandi mono ovanhu vahapu tava eta oinima yavo ndi i xwikile,” Nghiimbwasha ta ti.

Mopaife omulumenhu ou okwa pa ovanhu vatatu oilonga ovo tava longo mongeshefa yaye yokuxwikila.

Nghiimbwasha okwa ti oku na ondjodi yokupatulula ofikola yopaungomba tai kala hai yandje omadeulo okuxwikila kovanyasha.

“Mongeshefa yange omo handi mono oshimaliwa shokufutila ounona vange ve li vane ofikola. Ohandi longo noudiinini opo ndi kaleke po ongeshefa yange. Nonande ndi na oulema komaulu itandi teka omukumo shaashi onde lineekela kutya kape na oshniima hashi monika noupu,” Nghiimbwasha ta ti.

Nghiimbwasha okwa hokolola ena eshongo ledu apa a hala okutunga ofikola yopaungomba, oilongifo yopashinaena yokulongifa okuxwikila nayo oi li eshongo lakula. Ashike okwa ti nonande a taalela omashongo oku na ashike okulonga nelitulemo. Pexulilo okwa twa ovanyasha omukumo opo va kale tava kufa ombinga moinyangadalwa ei tai va etele oshimaliwa ngaashi okuninga eengeshefa.