Omukuunhu wopolifi moshitukulwa shaKaras Commissioner David Indongo okwa hokolola ta ti oumbudi wokunyeka ovanhu omaliko avo owa hanyaa unene modoolopa yaKeetmanshops. Indongo ta ti ominyeka edi otadi ningwa unene tuu pofitola yoShoprite opo unene pa didilikwa ohapa kala ovanyasha vahapu ve li moungudu tava nyeke po omaliko ovanhu konima ngeenge va landa oikulya yavo.

Indongo edi okwe dipopya pefimbo a ninga eenghundafana naKundana. Ta hokolola ta ti keshe efiku oitaashi yopolifi ohai yakula ovanhu veuya okulopota ngee va nyekwa oinima yavo koolyamupombo.

“Ovakainhu ovo unene va ninga oihakwa yokunyekwa omaliko avo ngaashi eengodi dopeka, oimaliwa noshoyo oilandifomwa yavo ngeenge tava landifile konima yofitola yoShoprite,” Indongo ta ti.

Okwa ti op ol i fi oy e shipondola okukala ya kwata po ookalyamupombo vamwe ashike vahapu ohava faduka po konima ngeenge va nyeka po oinima. “Opolifi oya ninga eenghendabala dokulongela mondjila yandja poShoprite nokutula po eameno nokukwata po ovanhu tava nyeke po omaliko avakwao,” Indongo ta ti.

Okwa weda po ta ti aalushe opolifi hai kala ponhele opo shaashi omafimbo amwe opolifi ohai kala ina oinakuwanifa ya yooloka onghee ngeenge ookalyamupombo ova mono kutya efiku olo kapena sha opolifi ohava kala ve li hunganeka moungudu oumbudi.

Indongo okwa kunghilila oshiwana opo shi kale tashi ende moungudu ngeenge tava di keenhele domangeshefelo opo va dule okuli amena. “Oshiwana nashi kale sha kotoka ngeenge tashi longifa eengodi dopeke shaashi ookalyamupombo ove hole okunyeka ko eengodi doshinanena,” Indongo ta ti.

Okwa weda po ta ti oshiwana nashi kale tashi longele kumwe mokukondjifa oimbuluma nokukala tashi yandje ouyelele kopolifi kombinga yoimbuluma.

– fhamalwa@nepc.com.na