New Era Newspaper

Icon Collap
...
Home / Ouministeli woikwameni tau ka longifa okatomheno kaShakati

Ouministeli woikwameni tau ka longifa okatomheno kaShakati

2021-06-07  Festus Hamalwa

Ouministeli woikwameni tau ka longifa okatomheno kaShakati
Top of a Page

Ouminesteli yoikwameni, etonatelo lokeengamba neameno owaya meenghundafana nelelo lodolopa yaShakati opo va kundufane kombinga yokatomheno aka keli mOshakati nghene kena oku longifwa.

Meenghundafana a ninga naKundana omupoliko mouministeli yoikwameni Margaret Kalo okwa hokolola ta ti oministeli yavo oya yaninga eundafano nelelo laShakati opo ikale tai longifa okatomheno oko keli mOshakati. Kalo okwa ti okatomheno oko ota kalongifwa okudipaelwa oingulu ei ili tai tekulwa kOndangwa kOlunho. Okwa ti oingulu ei oifike 2000, notai kale tai dipawa opo ikale tai liwa kovanadolongo moshilongo ashishe. “Oshikondo sheedolongo osha kala shataalela eshongo lakula lonhele yokudipaelwa oimuna yokuliwa kovanadolongo. Onghee paife otwa pandula eshi twa pewa epitikilo kelelo laShakati opo tudule okulongifa okatomhemo oko,” Kalo ta ti. Okwa ti ombelela ei tai kala tai dipawa yo tai tumwa keedolongo oshilongo ashishe opo kukwashipaleke kutya ovanadolongo ova mona ombelela yokulya.

“Ovanafalama vopomudingonoko nokoitukulwa yayooka yomonooli navo ova manguluka okukala tava longifa okatomheno aka, a shike tete ovena okupula epitikilo kovanambelewa voministeli yetu opo va pitikwe,” Kalo ta ti.

Kalo okwa ti okatomheno aka ota ka kayandja oilonga tai kalele noilonga yopokafimbo kovakwashiwana.

Okwa ti oministeli yoikwameni otai ka longifa oshimaliwa shi fike N$400 000, 00 opo shidule okulongifwa  okulongulula okatomheno oko ka kale ta kamonika nawa shaashi okakulupa paife.

“Ohandi kunghulile oshiwana opo shikale tashi longifa nawa okatomheno aka, onghee oilongifo oya pumbwa okukwatwa nawa nokukaleka po onhele yayela,” Kalo ta ti.


2021-06-07  Festus Hamalwa

Share on social media
Bottom of a page