New Era Newspaper

New Era Epaper
Icon Collap
...
Home / Ouministeli womidingonoko wa yandja oifitukuti

Ouministeli womidingonoko wa yandja oifitukuti

2021-09-16  Festus Hamalwa

Ouministeli womidingonoko wa yandja oifitukuti
Top of a Page

Etonatelwanhele loifitukuti li li moshindjahoololo shaKongo ola pewa oifitukuti i li ihetatu kouministeli womidingonoko, oixwa nomatalelepo Olomakaya.

Etonatelwanhele oli na oifitukuti ya yooloka ngaashi eeholongo, oumenye, eembabi nosho tuu oifitukuti ikwao.

Oifitukuti ei ya yandjwa okwa li ya tambulwa ko komunashipundi wetonatelwanhele loifitukuti mOkongo Martha Ndinohamba Nghidengwa nolupandu linene.

Moshipopiwa shaye okwa popya ta ti ova kala nokuninga omaindilo kouministeli womidingonoko opo va pewa oifitukuti yeengolo opo i kale momudingonoko waKongo.

Okwa ti etonatelwanhele lavo olo limwe hali kala li na ovatelelipo, novanafikola tava talele po oifitukuti ya yooloka ei i li monhele yavo.

“Mopaife otwa pewa oifitukuti ipe yeengolo, omo paife ovanhu vahapu vomoshitukulwa shaHangwena tava kala tave uya okutalela po oifitukuti. Onghee oshiwana osha manguluka opo shi kale sha talela po etonatelwanhele ngeenge sha hala okumona omaludi oifitukuti,” Nghidengwa ta ti.

Okwa denga omufindo ta ti ovanafikola ova manguluka okukala tava talele po etonatelwanhele loifitukuti ngeenge va hala okulihonga omaludi oifitukuti ya idililwa metonatelwanhele omo.

Okwa ti oifitukuti oi li meameno la wana, novanhu ngeenge tave uya okutalela po navo ova amenwa koifitukuti.

Okwa popya ta ti kukeshe ou e na ehalo lokutalela po etonatelwanhele loifitukuti na kale a kwatafana naye konomola yongodi yaye yo0814377541.

Okwa kunghulila oshiwana opo shi kale shi na elongelokumwe nokukelela okulongela oifitukuti ominyonena pefimbo ngeenge ve li meni letonatelwanhele.

Okwa ti onhele oya nuninwa keshe omunhu e na ehalo lokutalela po oifitukuti, ashike eshi sha fimana okukala omunhu a ninga omaindilo tete.

Okwa weda po ta ti natango otava kapula ouministeli yomidingonoko opo ikale ya eta omaludi oifitukuti ketonatelwanhele lavo.

“Ohandi kunghulile oshiwana opo shi kale tashi liufa komilandu doCovid-19 pefimbo keshe ngeenge tashi u ya okutalela po etonatelwanhele lofitukuti,” Nghidengwa ta ti. fhamalwa@nepc.com.na


2021-09-16  Festus Hamalwa

Share on social media
Bottom of a page