New Era Newspaper

New Era Epaper
Icon Collap
...
Home / Ouministeli wouhaku tau ka tunga omandiki oCovid

Ouministeli wouhaku tau ka tunga omandiki oCovid

2021-07-05  Festus Hamalwa

Ouministeli wouhaku tau ka tunga omandiki oCovid
Top of a Page

Ouministeli wouhaku nonghalonawa otau ka tunga omandiki aa taa ka longifwa okutula ovanhu ava tava ka kwatwa kombuto yoCovid-19.

Meenghundafana a ninga omukulunhuwiliki muoministeli wouhaku Ben Nangombe okwa hokolola ta ti Namibia mopaife okwa taalela
eshongo leenhele inadi wana okutula ovanhu va kwatwa koCovid-19, onghee oministeli otai ka tunga omandiki  koitukulwa yayooloka moshilongo opo a shiive oku longifwa kovanhu a va tava kwatwa kombuto ei.

Nangombe okwa ti oWindhoek otai ka tungilwa omandiki e li avali ouhaku, omo endiki limwe tali ka kala li na eembete 100, omanga endiki limwe otali ka kala li na eembete 70.

Omanga konooli otaku ka tungwa omandiki e li avali omo endiki limwe tali tungwa mOshakati li na eembete 40, omanga limwe otali ka tungwa moshitukulwa shaHangwena olo tali ka kala li na eembete 50.

“Omandiki aa otaa ka tungwa meendelelo ngaashi tashi dulika shaashi out li
mefimbo lidjuu lomukifi tau dana onghandangala moshilongo. Efiku nefiku omwaalu otau londo wa uka pombada wovanhu tava kwatwa kombuto ei. Onghee ohatu ka ninga ongheendabala opo tu tunge omandiki ahapu ouhaku omo tamu kala mu na ovanhu ve na oCovid-19,” Nangombe ta ti.

Nangombe okwa ti oitukulwa yimwe oi na omandiki a wana mopaife, omo a hokolola ta ti ngaashi koshitukulwa shErongo oku na omandiki ouhaku a wana, e na neembete da wana.

Okwa weda po ta ti ovenda yokutunhila ombuto yoCovid-19 nayo oi li ya wana manga, onghee oshiwana nashi ye shi
ka tunhilwe.

“Oministeli otai ka longa noudiinini opo i kwashipaleke kutya Namibia oku na oikwafifo ngaashi omipepo, eembete, omandiki ouhaku a wana okulwifa
ombuto ei,” Nangombe ta ti.

Nangombe okwa ti okwa pandula ovanailonga vouhaku eshi ve na oshisho noshiwana, yee ta ti kashipu okulonga novanhu ve na ombuto yoCovid-19 unene tuu pefimbo eli tai dipaa ovanhu
neenghono, onghee ovanailonga vouhaku otava longo oshilonga sha fimana neenghono.

“Oshiwana nashi longele kumwe noministeli opo tu dule okulwifa omukifi ou. Natu twikileni okuliufa komilandu
edi da tulwa po doCovid-19 shaashi ngeenge ohatu lihumbata nawa nena nomwaalu vovanhu tava kwatwa
kombuto otau shuna pedu,” Nangombe ta ti.


2021-07-05  Festus Hamalwa

Share on social media
Bottom of a page