Festus Hamalwa 

Ouministeli wounamapya, edu nomeva otau ka yadja omadeulo kovanafalama aveshe ava vena omapya avo ponokelwa koshipaxu. Omukulunhuwilika moumisteli ou Percy Misika okwa ti ouministeli waye owe li longekida opo u kwashilipaleka kutya ovanafalama aveshe ova pewa omadeulo nghee ve na oku lwifa oshipaxu.

“Ouministeli wounamapya tau lalakenene opo oshipaxu eshi shili moNamibia shi kale sha yela mo, osheshi otashi longele oikunomwa yovanafalama oushada, onghee ouministeli otau ka tuma ovanambelewa opo vaye koitukulwa yayooloka moshilongo va ka ya dje omadeulo,” Misika ta ti.

Okwa popya kutya omadeulo otaa ka tameka tete koitukulwa ei ya dengwa pomutima koshipaxu unene ngaashi Okavango kOkoushilo nokokOuninginino.

Elalakano loku yadja omadeulo aa oku kwashipeleka kutya ovanafalama ova mona ounongo wa wana kombinga nghee ve na oku konakona oshipaxu.

Misika ta ti kutya edeulo eli ola kwatela mo nghee omunafalama e na oku longifa omiti domeva noku dipaa oshipaxu, tashi pitile momukalo woku shaminia omiti momapya.

Okwa ti omiti dimwe edi ta di ka longifwa oku shashamina omapya oda pumbwa oku longifwa komunhu a pewa emadeulo shaashi oda nyika oshiponga. Onghee okwa yelifa kutya osha fimana ngeenge ovanafalama tave li tula mo momadeulo opo va ha ka longife omiti papu ko.

Nonande ouministeli wa taalela omashongo oilongifo i nai wana, Misika okwa ti eshi ita shiimbi nande oshipaxu shi kale shafindwa. Onghee elalakano oku kelela oshipaxu noikunomwa yovanafalama a veshe.

Okwa twa ovanafalama omukumo opo va twiikile nokulonga noudinini nokulinekela kutya ouministeli ota u longo nelitulemo opo u kadule po omukundu woshipaxu.