New Era Newspaper

New Era Epaper
Icon Collap
...
Home / Oumutwe vape otava ka longifwa okuya koilongo yaSADC - Kawana

Oumutwe vape otava ka longifwa okuya koilongo yaSADC - Kawana

2021-10-18  Festus Hamalwa

Oumutwe vape otava ka longifwa okuya koilongo yaSADC - Kawana

Minista woikwameni netonatelo lokeengamba Dr. Albert Kawana okwa popya Etine meumbo lomutumba wopashiwana ta ti oumutwe vape tava ka yandjwa koshiwana otava ka kala tava longifwa yo okuya koilongo yaSADC.

Okwa ti Namibia otaka lundulukila koumutwe vape, ovo tava ka kala tava longifwa kOvanamibia aveshe.

Edi okwe di popya eshi kwa li ta nyamukula komapulo ta pulwa koilyo yomeumbo lomutumba wopashiwana kombinga nghee oumutwe vape tava kala tava longifwa.

Kawana okwa ti oumutwe vape otava ka kala va yooloka kuvakwao shaashi ava vape itava kala vali ve na ohinga yomunwe womunhu.

“Ovanhu ngeenge tava tauluka eengamba itava pumbwa vali okukala tava yandje eepasporta, ndele paife omunhu ota kala ashike ta yandje okamutwe kaye koshilongo kape,” Kawana ta ti.

Okwa yelifa ta ti oumutwe vape ove na omauwa mahapu shaashi paife ovanhu otava kala va manguluka okuya koilongo aishe yaSADC, pehe na eendjindjikila dasha. Okwa ti oumutwe vape otava kala ve na eenomola odo tadi kala tadi talika kokompiuta ngeenge omunhu ta i kondje yoshilongo.

Minista okwa ti kape na manga efiku lowina kutya oumutwe otava ka tameka okuyandjwa naini, ashike oshiwana otashi ka shiivifilwa ngeenge aishe ya pu okulongekida.

“Oumutwe otava ka kala tava yandjwa keembeelwa adishe doikwameni moshilongo ngaashi sha kala shito,” Kawana ta ti. fhamalwa@nepc.com.na


2021-10-18  Festus Hamalwa

Share on social media