Omukonakoni woimbuluma wopolifi moshitukulwa shaMusati omupedu Commissioner Moses Simaho okwa ti ounona 11 ve li koshi yomido 15 ova longelwa oilonga youshada neudo eshi va kwatwa onghonga.

Okwa ti ounona va kwatwa onghonga omwa kwatelwa okaana keedula mbali oko kwa li ka kwatwa onghonga kuxeekulu muJanuali neudo.

Omwedi Februali naMei odo da dalopotwa di na ounona vahapu va kwatwa onghonga eshi mu na omivalu dounona vatatu keshe momwedi.

Omwedi June omwa lopotwa okaana ke na omido nee ka kwatwa onghonga komuneumbo vambulavo ha longo meumbo onga omufita woimuna.

Okwa hokolola ta ti ounona vahapu ohava kwatwa onghonga ngeenge ovadali vavo va dja mo meumbo ile ngeenge tava di keefikola.

Simaho okwa ti ounona vahapu ova kwatwa onghonga kovakwapata vavo vovanyeumbo va kula omanga vamwe ova kwatwa onghonga kovanailonga hava lifa oimuna vovakwashiwana vaAngola.

Okwa kunghilila ovadali opo va kale va tokokela ounona vavo efimbo keshe shaashi okwa didilikwa ounona voukadona va ninga oihakanwa wokulongelwa oushada wopaixulo.

“Oibofa yomakwatonghonga nai lopotwe pefimbo opo opolifi i dule okukala ya ninga omakonakono diva. Onghee eshi oha shi kala shipu ngeenge opolifi ya tolopotelwa diva opo omufekelwa akwate po,” Simaho ta ti.

– fhmalwa@nepc.com.na