Ounona vopofikola yoshikunino Omri-Onn Kavandje itava ka longelwa vali koshi yomuti eshi ofikola ya tungilwa eengulu mbali dokulongelwa ounona hava fikola oshikunino opo.
Oshikunino osha tungilwa eengulu nombelewa komusamaria a dja koGermany Nolfgang Fiedler konima eshi a lopotelwa kombinga yonghalo younona hava longelwa koshi yomuti.
Ofikola oya yambidindwa yoo vali noipundi, oitaafula, omaambo okulesha kounona noshipelende.
Pofikola opo ohava pa fikola ouonona ve li 38 novahongifikola vavo ve li vavali haliyambe okulonga ounona.
Moshipopiwa pefimbo ta yandje eengulu dofikola noikwafifo Nolfgang Fiedler okwa ti ota lakanene okushakeneka epangelo ondjilakati tashi pitile mokuyambidida oshikondo shehongo shaashi ehongo ola fimana kokaana keshe okaNamibia.
Okwa ti eshi kashishi oshikando shotete ta tungu eengulufikola moNamibia eshi natango kwa li a tunga po ofikola Eluwa Special School ili mOngwediva.
Okwa weda po ta ti ota twikile nokuyambidida eefikola da yooloka edi da talela omashongo oikwafifo yofikola neengulufikola.
Josefina Ndinelao Shitana oye umwe ta wiliki oshikunino osho, moshipopiwa shaye okwa ti okwa pandula unene eshi va ya tungilwa eengulofikola shaashi ounona itava kala vali tava longelwa koshi yomuti.
Okwa hokolola ta ti ova kala tava longo noundju okudja omudo 2012 eshi a tota po ofikola yoshikunino ei eshi va kala veha na oikwafifo yokulongifa ngeenge tava longo ounona noshoyo okukala tava lokwa pefimbo lodula.
“Oshikunino eshi osha fimana pomudingonoko wetu shaashi ohashi ya kula ounona vahapu eshi have uya momwaalu muhapu okutameka eetundi davo dopetameko onghee eshi ohashi tu pe omukumo opo tu longe nondjungu shaashi ovadali ove na ohokwe yokutuma ounona vavo ve uye keetundi,” Shitana ta hokolola.
Shitana okwa weda po ta ti ofikola natango otai indile moshiwana opo shi yambidide oshikunino shavo shaashi natango osha talela omashongo ngaashi olusheno, omeva noshoyo oluumbo lodalate opo ounona va kale ve li meameno ngeenge kofikola kuna oluumbo.
Okwa ti ku keshe ou e na ehalo lokuyambidida oshikunino shavo nakwatafane naye 0813626902.
Makili Patrick weedula nhano omunafikola hava fikola poshikunino opo, okwa lombwela Kundana ta ti ova pandula unene eshi va tungilwa eengulufikola shaashi nale okwa li hava kala tava dengwa koutalala eshi hava longelwa koshi yomuti.