Festus Hamalwa

Minista woukashikekookanhu nonghalonawa yokaana Doreen Sioka okwa ti osha fimana ngeenge ovafitaongalo tava yandje omayakulo exungomwenyo ile omapukululahombo kovaholafani opo ku kelelwe omahepeko oukashikekookanhu.

Sioka okwa kumaida ovafitaongalo opo va kale tava yandje omayakulo exungomwenyo kovanhu ovo ve na omaupyakadi momakwatafano opaihole ile meehombo shaashi eshi otashi kwafele ovaholafani opo vaha kwatwe komhepo yokudengafana.

Edi Sioka okwe di popya moshipopiwa shaye Etitano kefiku lokutula moilonga okuxulifa po omahepeko haa ningilwa ounona novakainhu mOngwediva.

Minista okwa ti oshiwana osha pumbwa okukala tashi ningilwa oikonga yokuyandja ehongo nouyelele kombinga yomahepeko oukashikekookanhu momikunda.

“Eepolohalama dihapu oda pumbwa okutotwa po ngaashi ovaxungimwenyo momikunda, okuyandja ehongo kounona voumati nghee ve na okukala tave lihumbata ngeenge ve li novakainhu,” ta ti.

Okwa weda po ti ouministeli waye otau kwashilipaleke kutya otau twikile nokutula po omilandu da yooloka odo tadi dulu okushunifa pedu omahepeko oukashikekookanhu moshilongo noshoyo okukwashipaleka eameno lounona novakainhu.

“Omahepeko oukashikekookanhu naa lopotwe pefimbo. Oshiwana nashi kale tashi topolelafana ouyelele nghee shi na okukala sha lopota ovanhu ovo tava ningile vakwao ominyonena momaumbo,” Sioka ta ti.

Minista okwa weda po ta ti neudo ovakainhu 1 378 ve li peedula 18 okuya pombada ova ninga oihakanwa yokulongelwa ominyonena dopaixulo eshi va kwatwa onghonga.

Moshipopiwa shaye komufala wopolifi moshitukulwa shaShana Commissioner Naftal Lungameni Sakaria okwa ti ovakainhu vamwe ohava kala tava ula ovalumenhu vavo omalaka mai eshi hashi dulu okueta opo omulumenhu a kale a denga omukainhu.

Onghee okwa kumaida ovakainhu opo va kale va kotokela omalaka avo ngeenge tava popi novalumenhu vavo shaashi eshi otashi kelele omahepeko omomaumbo.

Okwa weda po ta ti ovalumenhu vamwe navo ova ninga oihakanwa yokuhepekwa momaumbo eshi hava kala tava dengwa koonekulu vavo onghee okwa kumaida ovalumenhu opo navo va kale tava ka lopota ngeenge va ninga oihakanwa yokuhepekwa momaumbo.

“Okudipaa ile okudenga omukainhu woye kaku shi ekandulepo lomukundu onghee ovalumenhu natu kaleni hatu ka konga omakwafo.

fhamalwa@nepc.com.na